“ერთი სიტყვით, უკრაინის პრეზიდენტი დასავლეთს აიძულებს, გაიღვიძოს და საერთოდ არ ერიდება სიმკაცრეს. ოღონდ ისე კი არა, როგორც ამას ,,ქართული ოცნების” უნიჭო და უზრდელი ,,ბავშვები” აკეთებენ!”-სანაია

ჟურნალისტი ვახო სანაია სოციალურ ქსელში პოსტს აქვეყნებს:

“უკრაინის პრეზიდენტსა და მის დასავლელ კოლეგებს შორის განსხვავება – ცა და დედამიწაა. მიუნხენის უსაფრთხოების კონფერენციამ აჩვენა, როგორი უნდა იყოს პოლიტიკური ლიდერი – თამამი, მკაფიო, ეროვნული ინტერესების სადარაჯოზე მყოფი.

დღეს ევროპაში და შესაძლოა, მთელ დასავლეთში, ზელენსკი უპირველესი ლიდერია. ევროპა თვლემს, ვერ აცნობიერებს საფრთხეს. მსოფლიოს წამყვან დემოკრატიებს არასდროს ჰყოლიათ ასეთი სუსტი, უხერხემლო და უფერული მმართველები. ევროპის ქვეყნების ლიდერები ჰგვანან მდიდარ ოჯახებში, ფუფუნებაში, კომფორტში აღზრდილ ბავშვებს, რომლებიც ხანდახან ეზოში გამოდიან სათამაშოდ. იქ ველურ გარემოში გაზრდილი ერთი ხულიგანი თანატოლი თავში წამოარტყამს ხოლმე ხელს, აშანტაჟებს, ფულს სძალავს და ჩაგრავს. ესენი კი მაინც მზად არიან, ამ ხულიგანთან გაატარონ დრო.

აი, ზელენსკი ის ბიჭი აღმოჩნდა, რომელიც, ერთი მხრივ, ამ ხულიგანს არ უშინდება. მეორე მხრივ, იმ ფუფუნებაში გაზრდილი, შეშინებული და მიჩმორებული ბავშვების აზრზე მოყვანას ცდილობს.

ზელენსკი კარიერული პოლიტიკოსი არასდროს ყოფილა. საომარ ვითარებაში ეს მისი დადებითი მხარე აღმოჩნდა. პირდაპირი უთხრა დასავლეთს, რაც ყველას გულში აქვს და, როგორც წესი, ხმამაღლა თქმას ერიდებიან.
თუ ნატოს კარი ღიაა – მიგვიღეთ ! თუ არ არის ღია – პირდაპირ და გულწრფელად გვითხარით !
აწესებთ სანქციებს – გვითხარით, რა სანქციები იქნება ! გვითხარით ომის დაწყებამდე !

ერთი სიტყვით, უკრაინის პრეზიდენტი დასავლეთს აიძულებს, გაიღვიძოს და საერთოდ არ ერიდება სიმკაცრეს. ოღონდ ისე კი არა, როგორც ამას ,,ქართული ოცნების” უნიჭო და უზრდელი ,,ბავშვები” აკეთებენ საქართველოს საწინააღმდეგოდ და ყოველდღიურად უმტკიცებენ ყველა პარტნიორს, თავი დაგვანებეთო; არამედ პირიქით, ზელენსკი მოუწოდებს, დაეხმარნონ, მოქმედებს რა უკრაინის ეროვნული ინტერესების სასარგებლოდ.”