„ერთად უკრაინისთვის“ – ბაიდენის ახალი პროგრამა უკრაინელი ლტოლვილებისთვის

„ერთად უკრაინისთვის“ – ასე ეწოდება ამერიკის შეერთებული შტატების ახალ პროგრამას, რომლის შესახებაც პრეზიდენტმა ჯო ბაიდენმა განაცხადა და რომელმაც უკრაინელი ლტოლვილებისთვის შეერთებულ შტატებში თავშესაფრის მიღების პროცესი უნდა გაამარტივოს.

„ერთად უკრაინისთვის“ საშუალებას მისცემს შტატების მოქალაქეებსა და არასამთავრობო ორგანიზაციებს, დაასპონსორონ უკრაინელი ლტოლვილები, აღმოუჩინონ მათ ფინანსური დახმარება.

„პროგრამა იქნება მოქნილი და ის აჩვენებს, რომ ამერიკის შეერთებული შტატები პატივს სცემს საკუთარ ვალდებულებებს უკრაინელი ხალხის მიმართ. მათ აღარ დასჭირდებათ ჩვენი სამხრეთ საზღვრის გავლით შტატებში შემოსვლა“, – განაცხადა ბაიდენმა.

ახალი პროგრამისთვის ორშაბათს ჩაეშვება სპეციალური ვებგვერდი.

მარტში 5 000-ზე მეტმა უკრაინელმა სცადა შტატებში შესვლა, მათ შორის 3,200-მა მექსიკიდან. ამერიკული მედიის ცნობით, ისინი აშშ-ში ლტოლვილის სპეციალური სტატუსით შეუშვეს.