ჯანდაცვის მსოფლიო ორგანიზაციის (WHO) მონაცემებით, ერთ კვირაში (31 იანვარი-6 თებერვალი) მსოფლიოში აღირიცხა COVID-19-ის გამომწვევი კორონავირუსით ინფიცირების 19 276 472 შემთხვევა.
წინა ერთ კვირასთან შედარებით, ინფიცირებულთა რაოდენობა 17%-ით შემცირდა. ინფიცირების ახალმა შემთხვევებმა იკლო მსოფლიოს ყველა რეგიონში, გარდა წყნარი ოკეანის დასავლეთ ნაწილისა, სადაც 36%-იანი მატება იყო.
ბოლო კვირის განმავლობაში, მსოფლიოში COVID-19-ით გარდაიცვალა 67 953 ადამიანი. წინა 7-დღიან პერიოდთან შედარებით, ლეტალობის მაჩვენებელი 7%-ითაა გაზრდილი. გარდაცვალების შემთხვევებმა ყველაზე მეტად, 67%-ით იმატა სამხრეთ-აღმოსავლეთ აზიაში.
ჯანდაცვის მსოფლიო ორგანიზაციის ინფორმაციით, მსოფლიოს ყველა რეგიონში კლებას განაგრძობს კორონავირუს SARS-CoV-2-ის “ალფა”, “ბეტა”, “გამა” და „დელტა” ვარიანტების გავრცელება და ისევ სწრაფად ვრცელდება „ომიკრონი“. გლობალურ სამეცნიერო სისტემაში ბოლო 30 დღეში თვეში ატვირთული 426 363 ნიმუშიდან 96.7% „ომიკრონზე“ მოდიოდა და 3.3% „დელტაზე“. დანარჩენი ვარიანტების წილი 1%-ზე ნაკლები იყო.
პანდემიის პერიოდში გამოვლენილია დაავადება COVID-19-ის გამომწვევი კორონავირუსის, SARS-CoV-2-ის არაერთი სახეობა. ჯანდაცვის მსოფლიო ორგანიზაცია ვარიანტებს ანაწილებს ინტერესის ან შეშფოთების გამომწვევ სახეობებად და მათ ბერძნული ანბანის ასოებით აღნიშნავს. ამ დროისთვის შემაშფოთებელ ვარიანტებად მიჩნეულია: “ალფა”, “ბეტა”, “გამა”, “დელტა” და “ომიკრონი”.
კომენტარები