“ე.წ. ქვის ლოდებში მილიონი ლარია გადახდილი” – ენმ-ის ბრიფინგი ბათუმის მერიის სავარაუდო კორუფციულ გარიგებაზე

ბათუმის მერის, არჩილ ჩიქოვანის სავარაუდო კორუფციულ გარიგებაზე “ერთიანი ნაციონალური მოძრაობის” წევრმა, რევაზ ხარაზმა საგანგებო ბრიფინგი გამართა.

როგორც ბათუმის საკრებულოს დეპუტატმა აღნიშნა, ქვის სკამებში, რომელიც 6 მაისის პარკშია განთავსებული, მერიამ მილიონი ლარი გადაიხადა. მისი თქმით, ინვენტარის ნაწილი 1 თვეში უკვე მწყობრიდანაა გამოსული და ტერიტორიიდან გატანილია. 

რევაზ ხარაზი ამბობს, რომ რეალურად, მერიას პარკისთვის ინვენტარის შეძენა გაცილებით უფრო დაბალ ფასად შეეძლო.

“6 მაისის პარკში “ქართული ოცნების” მერიამ და ბატონმა ჩიქოვანმა შემოიტანა სხვადასხვა ინვენტარი. ინვენტარის ჩამონათვალში ძირითადად შედის სკამები, ე.წ. პუფები და ასე შემდეგ. თითოეული მათგანის ღირებულება, მაგალითად შავი სკამების, რომელიც უკვე მწყობრიდან გამოვიდა, გადახდილია ბიუჯეტიდან 1 ცალის ღირებულება 4 500 ლარი. ჯამში მილიონი ლარი არის გადახდილი ამ ე.წ. ქვის ლოდებში, რომელიც შემოიტანეს და დააწყვეს აქ. ბეტონის სკამის ღირებულება არის 2400 ლარი, ქვის ლოდი, რომელიც მოიტანეს და დააწყვეს აქ 3 800 ლარად შეაფასა მერიამ და იყიდა.

მოვიდეს ბატონი ჩიქოვანი და თვითონ დაჯდეს ამ ქვის ლოდზე. აბსოლუტურად უსარგებლოა. აქ იყო არაჩვეულებრივი სკამები, რომლის გამოყენებაც შეიძლებოდა, მსგავსის ყიდვაც გაცილებით იაფი დაჯდებოდა. უსარგებლო ნივთებში გადავყარეთ მილიონი ლარი და ახლა უკვე დაიწყეს გატანა ამ უსარგებლო ინვენტარის”, – თქვა რევაზ ხარაზმა.