“დროა, დაუწესდეს სანქციები ივანიშვილს, არაფერი აქ არ ხდება უშუალოდ მისი ჩარევის გარეშე” – რომან გოცირიძე

ერთიანი ნაციონალური მოძრაობის წევრი რომან გოცირიძე თბილისი პრაიდთან დაკავშირებით პრემიერმინისტრის, ირაკლი ღარიბაშვილის განცხადებას ეხმაურება და მის გადადგომას ითხოვს.

რომან გოცირიძე:

“პრემიერმინისტრი არის დამნაშავე, პროვოკატორი და მოძალადე. მისი განცხადება იყო წამახალისებელი იმ ბარბაროსული ქმედებებისა, რაც დღეს თბილისის ქუჩებში ხდება. ის დაუყოვნებლივ უნდა გადადგეს. ის არ არის პრემიერმინისტრი, ის არის ბიძინა ივანიშვილის ლაქია, მისი დავალებების შემსრულებელი.

ის ამბობს, რომ თურმე კონსტიტუციით მინიჭებული უფლებების რეალიზება, რასაც ცდილობდა დღეს საზოგადოების ერთი ჯგუფი, ყოფილა ოპოზიციის და ნაციონალური მოძრაობის მიერ ორგანიზებული. ეს არის პირდაპირი დანაშაული და ოპოზიციის პოლიტიკური დევნის გაგრძელება, რასაც წლების განმავლობაში ვხედავთ.

დაუყოვნებლივ, უნდა მოიწვიოს პარლამენტის თავმჯდომარემ და პრეზიდენტმა რიგგარეშე სხდომა, სადაც უნდა იყოს საუბარი ყველა იმ საკითხზე, რატომ მივედით აქამდე და რა არის გამოსავალი.

დიპლომატიურმა კორპუსმა საკუთარი მთავრობა უნდა ჩააყენოს ობიექტურად საქმის კურსში. დროა, დაუწესდეს საქართველოს მთავრობას სანქციები, მის ცალკეულ წევრებს და პერსონალურად ბიძინა ივანიშვილს, ვინაიდან დღეს ის არის ქვეყნის რეალური მმართველი და არაფერი აქ არ ხდება უშუალოდ მისი ჩარევის გარეშე. პასუხისმგებლობა ეკისრება თანაბრად როგორ მთავრობას, ასევე საპატრიარქოს, რომელმაც გაუწია ორგანიზება დღევანდელი, ასეთი აღვირახსნილი, ძალადობრივი აქციისა”