“დიახ, მივდივარ! ახლა მაქვს ორი არჩევანი” – ნიკა მელიას საბოლოო გადაწყვეტილება

ნაციონალური მოძრაობის ყოფილმა თავმჯდომარემ და უკვე ყოფილმა წევრმა, ნიკა მელიამ, საბოლოო გადაწყვეტილება გამოაცხადა:

11 წლის განმავლობაში არ შემიწყვეტია ბრძოლა ბიძინა ივანიშვილის წინააღმდეგ, რადგან ვთლიდი და ვთვლი, რომ ართმევს ქვეყანას უკეთეს მომავალს, ვიბრძოდი საპარლამენტო ტრიბუნიდან, ქუჩიდან, ციხიდან. არ მქონია სხვა არანაირი პოლიტიკური მიზანი, გარდა ხალხისა და ქვეყნის ინტერესის.

საქართველოში გვაქვს ის პოლიტიკური კლიმატი, რომელიც მთლიანად დაფუძნებულია არაფორმალურ, კულუარულ მართვაზე, რომელიც გასაქანს არ აძლევს პატიოსნებას, წესიერ ახალგაზრდებს, არც ერთ იდეალისტ ადამიანს.

დღეს საქართველოში გვაქვს სისტემა, რომელმაც ბევრი ადამიანი გახადა სკეპტიკოსი. პოლიტიკოსები ცდილობენ ამორალურობა აქციონ პოლიტიკურ სტანდარტად, ერთმანეთს არწმუნებენ, რომ პოლიტიკაში წარმატების მიღწევა შესაძლებელია მხოლოდ და მხოლოდ პრინციპებზე უარის თქმით. ივანიშვილის პოლიტიკის საფუძველი დღეს საქართველოში არის ფული, პოლიტიკური კორუფცია და დასანანია, რომ პოლიტიკური კლასის არც თუ ისე მცირე ნაწილმა მისი თამაში მიიღო. ცდილობენ დაარწმუნო საზოგადოება, რომ ამ მანკიერ პოლიტიკურ სტანდარტს აქვს გასაქანი ამ ქვეყანაში.

ძვირფასო მეგობრებო, ხშირად ეუბნებით ერთმანეთს, რომ ასე ცხოვრება შეუძლებელია, და ივანიშვილის დამარცხება ვერ ხერხდება, იმიტომ რომ ივანიშვილს აქვს ბევრი ფული. მე მჯერა რომ ივანიშვილის რეჟიმი დამარცხდება და მისი დამარცხება არის შესაძლებელი.

არ მჯერა, რომ ფულის დამარცხება შესაძლებელია ფულით, არ მჯერა, რომ ოდესმე ვინმე შეძლებს დაამარცხოს უღირსობა უღირსობით, არ მჯერა, რომ პოლიტიკური ვაჭრობა დამარცხებადია პოლიტიკრი ვაჭრობით. დღეს პოლიტიკურ კლასში, პოლიტიკოსების ნაწილს სჯერა, რომ მთავარი იარაღი პოლიტიკური ბრძოლის ფულია, მე კი მჯერა, რომ მთავარი იარაღი არის ღირსება, მორალი, სიტყვის ფასი და ზნეობა.

ეს არის ჩემი პოლიტიკური იდეალები, მჯერა, რომ ახალი გამარჯვების გზა ეს იქნება ეს. ეჭვი არ მეპარება, რომ ბევრი თქვენგანი ახლა ღელავს, განსაკუთრებით ის ადამიანები, ვისთან ერთადაც ვიბრძოლე, მეც დავკარგე პოლიტიკური კლასის დიდი ნაწილის მიმართ.

ახლა მაქვს ორი არჩევანი – ერთი გულისხმობს ნიღაბის გაკეთებას და ასე გაგრძელებას ან მეორე, ვიყო ბოლომდე გულწრფელი თავთან და თქვენთან. ვეცადე ამ პრინციპებს გაემარჯვა ნაციონალურ მოძრაობაში, მაგრამ ყრუ კედელი დაგვხდა, ყველას ინტერესის გათვალისწინება ხდება, გარდა ხალხის ინტერესისა.

სამწუხაროდ, ნაციონალურმა მოძრაობამაც, პოლიტიკურ სტანდარტად აქცია კულუარული გავლენები და არაფორმალური მმართველობა, საკუთარ სტანდარტად აქცია დემოკრატიისთვის კარის დაკეტვა, პოლიტიკითა და პოლიტიკოსებით ვაჭრობა. სიმართლე არის ბრძოლის მთავარი იარაღი და ექნება მეტი მხარდაჭერა. მართალი ხალხი არ იყიდება, მაგრამ მათ სჭირდება სივრცე ბრძოლისათვის. მჯერა, რო ვიქნებით ღირებულებით ერთობაში.

მივდივარ, თუ არა? – დიახ, მივდივარ მომავლისკენ, წარსულს ვტოვებ წარსულში. ძალიან ბევრს სჯერა, რომ საქართველოს ისტორიას დაწერს ოლიგარქიული მმართველობა, მე კი მჯერა, რომ საქართველოს ისტორიას დაწერს ქართველი ხალხი.