“დემოკრატების პირველი სერიოზული გამარჯვება, ტრამპის არჩევის შემდეგ” – ლევან ყურაშვილი

ლიბერალმა კანდიდატმა, სიუზან კროუფორდმა დაამარცხა ტრამპის ადმინისტრაციის მხარდაჭერილი კონსერვატორი ბრედ შიმელი, ვისკონსინის უზენაესი სასამართლოს არჩევნებში. რითიც ლიბერალებმა სასამართლოში 4-3-იანი უმრავლესობა შეინარჩუნეს.

ამ არჩევნების მნიშვნელობის გასაგებად ერთი ფაქტიც საკმარისია: ეს იყო ყველაზე ძვირიანი მოსამართლის არჩევნები ამერიკის ისტორიაში.

მთლიან კამპანიაში არც მეტი, არც ნაკლები – $98 მილიონი დაიხარჯა.

ილონ მასკი პირადად იყო კონსერვატორი კანდიდატის მხარდამჭერ კამპანიაში ჩართული.

ის ამბობდა, რომ ეს ცივილიზაციური არჩევანია და ამ კამპანიაში გამარჯვება უმნიშვნელოვანესია.

რამდენიმე დღის წინ, მან პირადად გადასცა ორ ადამიანს 1-1 მილიონ დოლარიანი ჩეკი, რომლებმაც “აქტივისტი მოსამართლეების” წინააღმდეგ პეტიციას მოაწერეს ხელი.

ასევე, ის სთავაზობდა $100-ს ყველას, ვინც კონსერვატორი კანდიდატის მხარდამჭერი ბანერით ფოტოს ატვირთავდა, ხოლო ყველა რეკრუტირებულ ხმაზე, $20-ს იხდიდა.

მიუხედავად ამისა, კროუფორდმა კომფორტული სხვაობით დაამარცხა შიმელი.

აქვე უნდა ითქვას, რომ კროუფორდს დემოკრატიული პარტიის მთელი ელიტა უჭერდა მხარს.

ასევე, სპეციალური არჩევნები ჩატარდა ორ ღრმად რესპუბლიკურ შტატში, ჰაუსის გამოთავისუფლებულ ადგილებზე.

თუ 2024-ში რესპუბლიკელებმა აქ 32-33%-იანი სხვაობებით მოიგეს, ახლა კანდიდატებს შორის სხვაობა 18%-ით შემცირდა და შესაბამისად, 14-15%-ს შეადგენს.

ერთი კვირის წინ, პენსილვანიის სენატის არჩევნების ერთ-ერთ ოლქში გაიმარჯვა დემოკრატმა კანდიდატმა. საინტერესო ეს ამბავი იმითაა, რომ 70 წლის განმავლობაში, რაც ამ ოლქში არჩევნები ტარდება, მხოლოდ ერთ პერიოდში, 1969-78 წლებში ჰქონდათ იქ დემოკრატ კანდიდატებს მოგებული და ახლა, 47 წლის შემდეგ ისევ გაიმარჯვეს.

მოკლედ, ეს უნდა იყოს სერიოზული wake up call როგორც ტრამპის ადმინისტრაციისათვის, ისე მთლიანად რესპუბლიკური პარტიისათვის.

აშკარაა, რომ აშშ-ს მოსახლეობის მნიშვნელოვანი ნაწილი უკმაყოფილოა ახალი ადმინისტრაციის მუშაობით და თუ ასე გაგრძელდა, 2026-ში რესპუბლიკური პარტია ჰაუსისა და სენატის უმრავლესობის დაკარგვის სერიოზული საფრთხის წინაშეა.