ტვ პირველის ცნობით, ეჟიმმა განსაკუთრებულ დავალებათა დეპარტამენტს დაზარალებულის სტატუსი მიანიჭა.
კრიმინალური პოლიციის უფროსისთვის, თემურ კუპატაძისთვის გაგზავნილ წერილში “ხარება” ჩივის იმის გამო, რომ აქციების დროს მისმა სპეცრაზმელებმა ეკიპირება დაკარგეს.
“შავი კაბურა, ფანარი, დასაკეცი ჩანთა, ყუმბარის ჩასადები, რობოკოპის ფარი, ჩაფხუტი , ხელკეტი, აირწინაღი და აირწინაღის ფილტრი, მათარა, პორტატული პროჟექტორი” – ეს არასრული ჩამონათვალია იმ ნივთების რომელიც განსაკუთრებულ დავალებათა დეპარტამენტმა აქციების პერიოდში ან დაკარგა ან გაუფუჭდა.
“ხარება” დაზარალებულად ცნეს იმის გამო რომ მან წერილი კრიმინალურ პოლიციაში გააგზავნა და დაიჩივლა, რომ აქციის მონაწილეებმა ფერადი საღებავებით დაუზიანეს წყლის ჭავლის მანქანა, გაუბზარეს საქარე მინდა და დაეკარგა კონკრეტული სპეცრაზმელებისთვის მიბარებული ნივთები.
რევაზ ღამბაშიძე, რომელსაც სპეცრაზმელები აღჭურვილობა აბარია, ადასტურეს, რომ დაკარგული ნივთები ერთ პატაკში ჩაწერეს, ბუღალტერიას ფასები დაადგენინეს და კრიმინალურ პოლიციას გაუგზავნეს. თემურ კუპატაძემ კი “ხარებას ბიჭების” დაკარგული ნივთების სია, სინდისის პატიმრების საქმეში ჩადო და მათ წინააღმდეგ იყენებს.
სინდისის პატიმრების სისხლის სამართლის საქმეში ვკითხულობთ, რომ სპეცრაზმელებს “დაეხათ უნიფორმებიც” – ზამთრის ჩაცმულობაც და ზაფხულისაც. საუბარია, 82 ქურთუკზე, 24 შარვალზე, ზაფხულის 127 ფეხსაცმელსა და ზამთრის 21 ფეხსაცმელზე. ასევე, დაზიანებულა ერთი ცალი შავი ყელიანი პულოვერი.
თუ სპეცრაზმელს ზაფხულის ფეხსაცმელი ნოემბერსა და დეკემბერში აქციების დარბევის დროს დაეხათ, რა შუაში არიან სინდისის პატიმრები და რატომ გაჩნდა ეს ზარალი რეჟიმის ტყვეების საქმეში?
თუ შსს სპეცრაზმელებს აიძულებს სიცივეში, ზამთრის ცუდ ამინდში, საზაფხულო ფეხსაცმლით იარონ?
უცნობის საქმეში დევს თუ არა სამხარაულის დასკვნა, მაგალითად, ზაფხულის 127 ფეხსაცმელზე, რადგან, სიტყვიერ მტკიცებას ნივთის გაფუჭების შესახებ, არანაირი სამართლებრივი ძალა არ აქვს.
უცნობია, საქმეში დევს თუ არა მტკიცებულება, რომ ნამდვილად სინდისის პატიმრებმა დაუზიანეს მათ ეს ნივთები.
პრინციპში, რომც იდოს, ორივე მტკიცებულება უსამართლო იქნება, რადგან სპეცრაზმელები არ იყენებდნენ მაიდენტიფიცირებელ ნიშნებს, იმ შემთხვევაშიც კი, თუ დამტკიცდება, რომ მაგალითად, საზაფხულო ფეხსაცმელი დაზიანებულია, ვერ დაამტკიცებენ, რომ ნამდვილად სპეცრაზმელის იყო, რადგან სპეცრაზმელთა ვინაობები კი არა და, მაიდენტიფიცირებელი ნიშნები თავად გააქრეს.
სინდისის პატიმრების საქმეში დაზარალებულის სტატუსი აქვს საპატრულო პოლიციის დეპარტამენტსაც. დადგენილება დაზარალებულად ცნობის შესახებ სანქცირებულმა პროკურორმა, ვაჟა თოდუამ შეადგინა. ამ შემთხვევაში, რეჟიმის პატიმრებს “შკოდას” ორი მანქანის დაზიანებას აბრალებენ. დაზარალებულად ცნეს თბილისის მერიის ურბანული განვითარების სააგენტო და თბილსერვისიც. 16 იანვარს გამოძიებისთვის მიცემულ ჩვენებაში თბილსერვის ჯგუფის თანამშრომელი, იოსებ მამადაშვილი წერს, რომ 28 ნოემბრიდან 3 დეკემბრამდე პერიოდში აქციების მონაწილეებმა დააზიანეს მერიის ბალანსზე არსებული ინვენტარი.
რეჟიმის გამოძიებამ ზარალში ჩაწერა პარლამენტის შენობიდან საპროტესტო გზავნილების წაშლაც. საკანონმდებლო ორგანოს კედლების გასუფთავება თუ საქმის მასალებს დავეყრდნობით 20 ათასი ლარი დაჯდა. თბილისის მერია ჩივის განადგურებულ ბუჩქებზე და ბალახის საფარზე.
ე.წ. დაზარალებულ უწყებებს შორის ლიდერი პარლამენტია. 2025 წლის 17 იანვარს გამოიკითხა პარლამენტის სამეურნეო უზრუნველყოფის დეპარტამენტის უფროსი. ისიც წერს, რომ აქციით მონაწილე მხრიდან დაზიანებულ ან განადგურებულ იქნა პარლამენტის ბალანსზე არსებული ინვენტარი და ინფრასტრუქტურა.
შენობაში, რომელიც აქციის მიმდინარეობის დროს, სპეცრაზმი იყო გამაგრებული, ამტკიცებენ, რომ კონდინციონერი და ფარდები დაზიანდა.
მაღაზია “ბოსიც” ამტკიცებს, რომ ვიტრინა აქციის მონაწილეებმა ჩაუმსხვრიეს – ის დაზარალებულად უკვე სცნეს.
კომენტარები