მთავრობის ადმინისტრაციის შენობასთან დევნილები საპროტესტო აქციას მართავენ. ისინი ამბობენ, რომ საცხოვრებელი, სადაც ამჟამად იმყოფებიან უსაფრთხო არ არის და ალტერნატიული ფართებით დაკმაყოფილებას ითხოვენ.
მათი ინფორმაციით, რამდენიმე დღის წინ ჩამოცვენილი ბათქაშის გამო ერთ-ერთ პირს ჯანმრთელობაც დაუზიანდა და მას სამედიცინო დახმარების გაწევა დასჭირდა. ასეთივე შემთხვევა მოხდა გუშინაც, რა დროსაც ოთხმა ბავშვმა მცირე დაზიანებები მიიღო.
დევნილები უკვე რამდენიმე დღეა, აქციებს მართავენ. 12 იანვარს აქცია გაიმართა ჯანდაცვის სამინისტროსთანაც. ისინი მინისტრთან შეხვედრას ითხოვდნენ, თუმცა მის ნაცვლად, ჯანდაცვის მინისტრის მოადგილე შეხვდათ.
დევნილები ამბობენ, რომ დღევანდელი აქცია გამაფრთხილებელია და თუ მათი მოთხოვნები დროულად არ დაკმაყოფილდება, ისინი პროტესტის უკიდურეს ფორმას – შიმშილობას მიმართავენ.
“უკიდურესად მძიმე პირობებში ვცხოვრობთ. გაუსაძლისია ჩვენს შენობაში ცხოვრება და იქიდან გამომდინარე, რომ არავინ გვაქცევს ჯანდაცვის სამინისტროდან ყურადღებას, ერთადერთი რაც დაგვრჩა არის ის, რომ მოვიდეთ კანცელარიის წინ, მშვიდობიანად, მოვითხოვთ ერთადერთი რამ, ეს არის საყოფაცხოვრებო ბინებით დაკმაყოფილება, თუ ეს მოთხოვნა დაკმაყოფილებული არ იქნება მივმართავთ უკიდურეს ფორმას და დავიწყებთ შიმშილობას”, – თქვა აქციის ერთ-ერთმა მონაწილემ.
აქციის მონაწილეების თქმით, ადმინისტრაციის წარმომადგენელმა დევნილებს უთხრა, რომ პრემიერმინისტრ ირაკლი ღარიბაშვილისთვის წერილი დაეტოვებინათ.
აქციის მონაწილეები აპირებენ, რომ დღესვე კიდევ ერთი აქცია ჯანდაცვის სამინისტროსთან გამართონ.
წყარო – მთავარი
კომენტარები