“დარია დუგინა კი არა, იმპერატორი ალექსანდრე მეორე და პრემიერი-მინისტრი სტოლიპინი მოკლეს” – შარაშენიძე

მსგავსი რამეები რუსეთში მე-19 საუკუნიდან მოყოლებული ხდება. დარია კი არა, იმპერატორი ალექსანდრე მეორე და პრემიერი-მინისტრი სტოლიპინი მოკლეს. სხვა შორის, ალექსანდრე ააფეთქეს.

უკრაინელების მხრიდან მსგავსი რამის გაკეთება პრაქტიკულად გამორიცხულია. დუგინის მოკვლა მათ ბევრს არაფერს მისცემდა. პირიქით, როცა სხვა ყველაფერთან ერთად საინფორმაციო ომში ხარ ჩართული, მოწინააღმდეგე მხარეს ასეთი ოდიოზური ფიგურის არსებობა გაწყობს კიდეც. გარდა ამისა, მსგავსი ნაბიჯი უკრაინას რეპუტაციულად დააზარალებდა დასავლეთში; რაც არ უნდა მონსტრს ეომებოდე, ტერაქტის მოწყობა არ არის ლამაზი, მითუმეტეს როცა ევროკავშირის წევრობის კანდიდატი ქვეყანა ხარ.

არც კრემლის გაკეთებული მგონია. ცხადია შეიძლება გაგვახსენდეს საცხოვრებელი კორპუსების საეჭვო აფეთქება რუსეთში რასაც მალე ჩეჩნეთში ახალი ომი მოჰყვა. მაგრამ უკრაინაში ომი უკვე დიდი ხანია მიდის. ტერაქტი წესით არც კიევის შესაძლო დაბომბვის გამართლებად უნდა დასჭირდეთ. თუ რამეა კიევის დაბომბვას ყირიმის დაბომბვით გაამართლებენ (თუკი ცხადია რუსებს აქვთ კიევის დაბომბვის შნო).

და მაინც, არსებობის უფლება აქვს კიდევ ერთ, კონსპირაციულ ვერსიას: ეს რაღაც დაჯგუფება, რომელიც აშკარად დუგინს უმიზნებდა და მისი შვილი შემოაკვდა, შეიძლება ეფესბეს (ანუ, მაინც კრემლის) პროექტია. პროექტი შექმნილი იმ მიზნით რომ ქვეყნის შიგნით ახალი რეპრესიები გაჩაღდეს და მოსახლეობა კიდევ უფრო მეტად დაირაზმოს როგორც გარე, ასევე შიდა “მტრების” წინააღმდეგ. ამ მიზნისათვის დიდი პრობლემა არ უნდა იყოს დუგინის გაწირვა რომელსაც რუსეთის მთავრობაში და სპეცსამსახურებში სერიოზულად არავინ უყურებს.”