ანალიტიკოსი, ზურაბ ბატიაშვილი:
“უკრაინელებს იზიუმშიც ზუსტად ის სურათი დახვდათ, რაც ბუჩეში. ოკუპანტები წინასწარ გამზადებული სიებით დადიოდნენ და ხოცავდნენ იმ ადამიანებს და მათი ოჯახის წევრებს, რომლებსაც ოდესმე უმსახურიათ უკრაინის საჯარო სექტორში (პოლიციელები, ჯარისკაცები, სამინისტროების ან ადგილობრივი ხელისუფლების წარმომადგენლები და ა.შ.).
თუმცა, რუსეთის ამ ქმედებაში ახალი არაფერია. მათ, ხელმძღვანელობდნენ რა სტალინის პრინციპით “არ არის ადამიანი, არ არის პრობლემა”, გააკეთეს ზუსტად იგივე, რაც მანამდე ჩაიდინეს ჩვენთან 1921, 1924, 1937 წლებში, მერე კატინში, მერე აფხაზეთში, მერე ჩეჩნეთში, მერე 2008 წელს, მერე სირიაში…
ასე გამზადებული სიებით ჩამოივლიდნენ აქაც თუ უკრაინაში გაიმარჯვებდნენ და ჩვენ დაგვიპყრობდნენ.
და არ იფიქროთ, რომ ან “ოცნების” აქტივისტებს დაინდობდნენ, ან – სუსის თანამშრომლებს იმის გამო, რომ დღეს ისინი მათი მოკავშირეები არიან.
ისევ უკრაინის მაგალითი რომ ავიღოთ, ოკუპანტებმა დახოცეს ისინიც, ვინც ადრე უკრაინის ყველაზე პრორუსი პრეზიდენტის იანუკოვიჩის აქტიური მხარდამჭერები იყვნენ ან მის დროს მუშაობდნენ საჯარო სექტორში.
ყველაზე მეტი უბედურებაც (დაბობმვები, გაუპატიურებები, მკვლელობები და ა.შ.) ხომ სწორედ იმ რუსულენოვან ნაწილს მიაყენეს, რომლებიც ვითომდა “დასახმარებლად” დაიწყეს ეს საშინელი ომი.
ასე რომ ერთხელ მაინც დაფიქრდით აქაურო რუსეთუმეებო, (რომლებიც ბევრი ხართ დასაქმებული იმავე საჯარო სექტორში) რა გელით თქვენ და თქვენი ოჯახის წევრებს რუსული ოკუპაციის შემთხვევაში!”
კომენტარები