“დახარჯავდა ამ ფულს არაყში? გადაჰკრავ არაყს, გაგეთიშება შუქი… დაზარალდა წესიერი გადამხდელი” – რომან გოცირიძე

“ენმ”-ის წევრი, რომან გოცირიძე:

“სოციალისტური სიმახინჯის მაგალითია სვანეთის მომარაგება უფასო ელექტროენერგიით. ამან გამოიწვია მისი უყაირათო მოხმარება( განსაკუთრებით კრიპტოვალუტის კუსტარული მოპოვების გამო), რასაც მოჰყვა ელექროენერგიის დეფიციტი და ადგილობრივი ენერგოსისტემის დაზიანება ზედმეტი დატვირთვის გამო.

რა უნდა გაეკეთებინა მთავრობას, თუ კი სვანეთში საჭირო იყო მოსახლეობის მხარდაჭერა ელექტროენერგიის საფასურის გადახდის სახით? უნდა მოეხდინა მომსახურების მონეტიზაცია, ანუ ფულის მიცემა განსაზღვრული მოცულობის ელექტროენერგიის შესაძენად. დახარჯავდა ამ ფულს არაყში? ეს მისი ნება იქნებოდა, გადაჰკრავ არაყს, გაგეთიშება შუქი. ახლა რა ხდება? ნაცვლად იმისა, რომ კონკრეტული მომხმარებლისათვის შეეწყვიტათ დენის მიწოდება, ჩააბნელეს მთელი სვანეთი, დააწესეს გრაფიკი. ამით დაზარალდა წესიერი გადამხდელი. ახლა დაიწყება კრიპტოვალუტის მომპოვებლების წინააღმდეგ ომი. არა და რაში არიან ისინი დამნაშავეები-არის იაფი დენი, დადგეს სერვერი. ეს სულაც არაა უკანონო საქმიანობა. დააწესე ელექტროენერგიის საბაზრო ფასი და მორჩება ყველაფერი.

ერთი მაგალითი საქართველოს ისტორიიდან: 90-იანი წლების დასაყისში საქართველოში პურის ფასი იყო ყველაზე დაბალი ყოფილ საბჭოთა რესპუბლიკებს შორის და ღირდა 30 კაპიკი, რამდენჯერმე იაფი სხვებთან შედარებით. ეს მოსახლეობაზე ზრუნვის მოტივით კეთდება. ფასი იმდენად დაბალი იყო, რომ საქონლის პურით გამოკვება უფრო იაფი ჯდებოდა, ვიდრე ქატოთი. ფქვილი უფრო ძვირი ღირდა, ვიდრე პური. საქმე იქამდე მივიდა, რომ აზერბაიჯანიდან და სომხეთიდან მოდიოდნენ ჩვენთან პურის საყიდლად( არ იყო მაშინ საზღვარი) და თავიანთ ძროხებს და ღორებს ჩვენი ფუნთუშებით ანებივრებდნენ.

მხოლოდ პურზე საბაზრო ფასების დაწესებამ შექმნა ამ სფეროში კერძო წარმოება. დღეს ეს სექტორი ყველაზე საბაზროა და კონკურენციის ხარისხიც ყველაზე მაღალია, ამიტომ სასაცილო იყო, როცა მთავრობის დავალებით ანტიმონოპოლისტურმა სამსახურმა დაიწყო პურზე ფასების ზრდის მიზეზების შესწავლა. შეკვეთა იყო, რომ ვიღაცა, განტევების ვაცი, დაესაჯათ. რა შეისწავლეს და რა დაადგინეს დღემდე არაა ცნობილი.”