პარლამენტის თავმჯდომარე, შალვა პაპუაშვილი ევროპის საბჭოს განცხადებებს ეხმაურება და ამბობს, რომ არც ერთი რომ არ შეასრულოს ცხრა დათქმიდან საქართველომ, მაინც ლიდერები ვართ და მაინც უნდა გახსნან მოლაპარაკებები. პაპუაშვილი არ ამბობს, თუ არ აპირებდნენ შესრულებას 9 დათქმის, რატომ დაეთანხმნენ და ცხადია, არც იმას ამბობს, რა შეიძლება დაემუქროს ქვეყანას, რომლის ხელისუფლებაც საკუთარ დადებულ პირობებს არღვევს, ან ქვეყნის პარტნიორებს ამ ენით ესაუბრება და მსგავს ბრალდებებს უყენებს.
“რაც შეეხება ევროპული საბჭოს განცხადებებს და გადაწყვეტილებებს, მისასალმებელია, რომ კვლავ არის მხარდაჭერა საქართველოს მიმართ. ამავე დროს, ჩვენ ვნახეთ გადაწყვეტილება, რომ ბოსნიას და ჰერცეგოვინასთან გაიხსნას მოლაპარაკებები. დღეის მდგომარეობით არის გადაწყვეტილება უკრაინასთან, მოლდოვასთან და ბოსნია-ჰერცეგოვინასთან დაკავშირებით, რაც კიდევ ერთხელ აჩვენებს გადაწყვეტილებების უსამართლობას. საქართველო, რომელიც სამივე ქვეყანასთან შედარებით ლიდერია აბსოლუტურად ყველა პარამეტრით, არის დაჩაგრული. ეს უსამართლობა ძალიან სამწუხაროა ევროკავშირის მხრიდან. კიდევ ერთხელ აჩვენებს, რომ სამწუხაროდ, გადაწყვეტილებები არ არის დაფუძნებული დამსახურებაზე. იმედი მაქვს, ევროკავშირი ამ წლის განმავლობაში მიიღებს საბოლოოდ სამართლიან გადაწყვეტილებას საქართველოსთან დაკავშირებით.
ამ 9 დათქმიდან არცერთი რომ არ შესრულდეს, მაინც ლიდერები ვართ. მიუხედავად იმისა, რომ თავად ევროკომისიის შეფასებით, საქართველო ყველა პარამეტრით ლიდერია, საქართველო და ქართველი ხალხი იჩაგრება ასეთი უსამართლო გადაწყვეტილებებით. უპირველეს ყოვლისა, საქართველოს ხელისუფლება რასაც აკეთებს, მუშაობს, რათა ევროკავშირი დაარწმუნოს, გადაწყვეტილებები იყოს დამსახურებაზე დაფუძნებული და სამართლიანი“, – განაცხადა პაპუაშვილმა.
როგორ ებრძვის ევროკავშირი ოცნებას და რა აიძულა EU-ს საქართველომ? – EU-ს “ბინძურ გეგმაზე” კალაძე
კომენტარები