„დაბრუნება მინდა სადაც დედა ცოცხალია“ – ნიკა გვარამიას ემოციური პოსტი

ტელეკომპანია „მთავარი არხის“ გენერალური დირექტორი ნიკა გვარამია სოციალურ ქსელში ემოციურ პოსტს აქვეყნებს:

„დაბრუნება მინდა.
სადაც დედა ცოცხალია და სკოლიდან მოსულს, ჩემი საყვარელი კარაქში, ნიორში, პილპილსა და ხახვში შემწვარი ხბოს დაბეგვილი ხორცის სუნს ატრიალებს.
სადაც მამა სამუშაოდან გვიან ბრუნდება, ბევრს ეწევა, დედას ეჯუჯღუნება, მაგრამ მაინც ყველაზე მშვიდი და გაწონასწორებულია სამყაროში.
სადაც ეზოში ლეღვის ფოთლების მომწარო, ლეღვის მერქნის მსუყე და ლეღვის ნაყოფის მოტკბო-მომჟაო სურნელია.
ოლეანდრების და გლიცინიების ქალაქში დაბრუნება მინდა. ზღვიდან წამოსული ბრიზი რომ მარილის და იოდის არომატს ამატებს და ამ ნაზავს მთელ ქალაქში ფანტავს, სანამ მთაზე შეფენილი კიპარისების და ციტრუსების ბაღების სუნს არ შეაჯახებს და ამ ქალაქის უნიკალურ არომატს არ შეაჯერებს. აი, იმას, სიზმარში რომ მცემს.
მე, ვინც ფერად სიზმრებსაც კი ვერ ვხედავ.
მე, ვინც არდადეგებიდან დაბრუნებისას, მანქანაში ჩაძინებული, ჩემს ქალაქს სუნით რომ ვცნობდი და ეგრევე თავს წამოვყოფდი – “როგორც იქნა, სოხუმია”.
მე, ვინც უკვე ძლივსღა ვიხსენებ ჩემს ქალაქს და ყველაზე ცხადად მაინც ეს სურნელი და მშობლების ხმა ჩამესმის ხოლმე.
მე, ვინც დაბრუნების გარდა, აღარაფერზე ვოცნებობ.

ამის შესახებ ნიკა გვარამია სოციალურ ქსელში წერს“ – წერს ნიკა გვარამია.