ჩრდილოეთ კორეაში ეკონომიკური პრობლემებისა და სურსათის დეფიციტის ფონზე ხელისუფლება კუპონების ბეჭდვას იწყებს, რომლებიც ნაღდ ფულს ჩაანაცვლებს. ამასთან, ქვეყანაში შავი გედების მოშენება იწყება, რომლებსაც საკვებად გამოიყენებენ. ინფორმაციას Reuters ავრცელებს.
ადგილობრივი მედია წერს, რომ ჩრდილოეთ კორეის ცენტრალურმა ბანკმა, ქვეყანაში ბანკნოტების დეფიციტის გამო, ფულის კუპონების დაბეჭდვა უკვე დაიწყო. ამასთან, იაპონური გამოცემა Rimjin-gang წერს, რომ კუპონები მიმოქცევაში უკვე აგვისტოდან გამოჩნდა, რადგან ოფიციალური ვალუტის დასაბეჭდად საჭირო ქაღალდი და მელანი ჩინეთიდან აღარ შემოდის.
ბანკნოტების დეფიციტზე, შესაძლოა, გავლენა მოახდინა უცხოური ვალუტის გამოყენებაზე ხელისუფლების მკაცრმა ზომებმა. ქვეყანაში მანამდე აქტიურ მიმოქცევაში იყო აშშ დოლარი და ჩინური იუანი.
ამ კვირაში ჩრდილოეთ კორეის სახელმწიფო მედია აქტიურად უწევდა პროპაგანდას შავი გედის ხორცის მიღებას და აღნიშნავდა, რომ სამრეწველო მასშტაბებში მის მოშენებას ადამიანის ცხოვრების გაუმჯობესება შეუძლია.
“შავი გედის ხორცი შესანიშნავია და სამკურნალო თვისებებიც აქვს”, – აღნიშნავდა მედია.
საერთაშორისო დამკვირვებლები თვლიან, რომ სასურსათო და ეკონომიკური მდგომარეობა ჩრდილოეთ კორეაში საშიშია, ვინაიდან მოსავლის მარაგი იწურება და არის ნიშნები, რომ ქვეყანა ზრდის ვაჭრობას და იღებს დიდი რაოდენობით ჰუმანიტარულ დახმარებას ჩინეთის დახმარებით.
კომენტარები