„ვგეგმავთ აქციებს და შემდეგ უკიდურეს ზომას მივმართავ, ეს იქნება ჩემი ბოლო მიმართვა სახელმწიფოს მიმართ, გადავალ ე.წ. საზღვრის იქით,“ – ამის შესახებ ზაზა გახელაძის მეუღლემ, ირმა ბუთხუზმა განაცხადა.
ოკუპანტების მიერ ტყვეობაში მყოფი 33 წლის ზაზა გახელაძის ოჯახის წევრები ერგნეთში, ინციდენტების პრევენციისა და მათზე რეაგირების მექანიზმის ფორმატში, რიგით მე-100 შეხვედრას ესწრებიან.
შეხვედრის დაწყებამდე გახელაძის მეუღლე და მშობლები სუს-ის საინფორმაციო-ანალიტიკური დეპარტამენტის დირექტორის მოადგილეს და შერიგებისა და სამოქალაქო თანასწორობის საკითხებში სახელმწიფო მინისტრის მოადგილეს შეხვდნენ.
„ხელისუფლება რა ნაბიჯებს დგამდა, ჩვენ ნამდვილად არ ვიცოდით – რა ხდებოდა და რა შეიძლება გაკეთებულიყო, ამაში არ ვერეოდით და არც გვეუბნებოდნენ, მაგრამ გვწამდა, რომ რეალური ნაბიჯები გადაიდგმებოდა. ერთი ალბათ რაც დაგვრჩა და უნდა გაკეთდეს, ეს არის უკვე ოჯახის მოქმედება, ალბათ ჩვენი ძალისხმევით გაკეთდება ის, რომ შედეგი გამოიღოს,“ – განაცხადა ზაზა გახელაძის მეუღლემ, ირმა ბუთხუზმა.
ზაზა გახელაძის ოჯახის წევრები დღეს, ერგნეთში, ეუთო-ს გენერალურ მდივანთან ჰელგა მარია შმიდტთან შეხვედრასაც გეგმავენ.
გახელაძის მამის, მიხეილ გახელაძის განცხადებით, როდესაც ისინი მაისში პრემიერ-მინისტრს, ირაკლი ღარიბაშვილს შეხვდნენ, დიდი იმედი ჩაესახათ, რომ ორ კვირაში ზაზა გახელაძე სახლში უნდა დაბრუნებულიყო, მაგრამ როგორც ოკუპანტების ტყვის მამამ თქვა, სამწუხაროდ. შედეგი არ დამდგარა.
„დიდი მოლოდინი გვქონდა მაისში, როდესაც პრემიერ-მინისტრს შევხვდით.. დიპლომატიური კორპუსის წარმომადგენლებთან შეხვედრა გუშინაც გვქონდა და გვითხრეს, რომ მოლაპარაკების პროცესში ჩართულები არიან. დაგვაიმედეს, ვნახოთ რა იქნება. დღეს ერგნეთში ჩამოვედით, რომ ეუთოს გენერალურ მდივანსაც შევხვდეთ და დახმარება ვთხოვოთ,“– განაცხადა ზაზა გახელაძის მამამ, მიხეილ გახელაძემ.
ერგნეთში მიმდინარე შეხვედრის დაწყებამდე განცხადება სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილემ, ირაკლი ანთაძემაც გააკეთა. მისი თქმით, მოცემულობა ერთია, რომ ყველა უკანონო პატიმარი საკუთარ სახლებს აუცილებლად დაუბრუნდება.
უბრალოდ, არის სიტუაცია, განსაკუთრებით, ეს ახასიათებს მოლაპარაკების პროცესს ისეთ რთულ საქმეებში, როგორიც არის, ვთქვათ, იგივე ოკუპირებული რეგიონები, რომ კონკრეტულ დროში მოცემულობა ერთ ინდიკატორს გვიჩვენებს, მაგრამ პროცესში, დინამიკიდან გამომდინარე, ამ ინდიკატორებმა შესაძლოა გარკვეული კორელაცია განიცადონ, თუმცა, კიდევ ერთხელ ხაზგასმით მინდა აღვნიშნო, რომ ეს ჩვენს პოზიციას არ ცვლი, ჩვენ მომართული ვართ და ეს არის ჩვენი მიზანი – უკანონო პატიმრობაში მყოფი ჩვენი ყველა თანამოქალაქე საკუთარ სახლებში დაბრუნდეს და ეს აუცილებლად ასე იქნება,“ – განაცხადა ირაკლი ანთაძემ.
კომენტარები