მოკლული ბუტა რობაქიძის მამა, სოსო რობაქიძე კვირის პალიტრასთან საუბარში საქართველოს მესამე პრეზიდენტზე, მიხეილ სააკაშვილზე საუბრობს და ამბობს, რომ საქართველოში ჩამოვიდა კაცი, რომელიც ნომერ პირველი ჯალათი, ქართული ფაშიზმის დამფუძნებელი და ლიდერია.
მისივე თქმით, სააკაშვილის პრეზიდენტობის დროს ქუჩაში 175 ახალგაზრდა მოკლეს, ის ქართველმა ერმა უნდა დასაჯოს.
“საქართველოში ჩამოვიდა კაცი, რომელიც არის ნომერ პირველი ჯალათი, ქართული ფაშიზმის დამფუძნებელი და ლიდერი. დააპატიმრეს ეს ადამიანი და ახლა მის განთავისუფლებას ითხოვენ. ნუ გგონიათ, რომელიმე დანაშაული მიშას გარეშე მოხდა. გაიხსენეთ მისი ფრაზები და გაგახსენდებათ რა დონის დამნაშავესთან გვაქვს საქმე. “ტყვია არ გვემეტება”, “ყველანი ციხეში”, “ნულოვანი ტოლერანტობა” და ასე შემდეგ, გაიხსენეთ აფრასიძეების საქმე, როგორ ჩაცხრილეს და ამოხოცეს ეს ოჯახი და როგორ იძახდა მიშა, მე გავეცი ბრძანებაო. მისი პრეზიდენტობის დროს ქუჩაში 175 ახალგაზრდა მოკლეს. რ
ოცა ამ ამბების დეტალებს ვიკვლევდით, უმოწყალოდ დახოცილ კიდევ 55 ახალგაზრდას მივაკვლიეთ. უმძიმესია იმ წლების სტატისტიკა, ამ ჯალათების მიერ 300 უდანაშაულო ადამიანია ქუჩაში დახოცილი და მათი ყველაზე დიდი ასაკი 24-დან 26 წლამდე იყო. ამ ხელისუფლებამ ქვეყანაში გენოციდი მოაწყო და ეს კაცი ახლა როგორ უნდა დაუძვრეს სამართალს, როგორ არ უნდა აგოს მან პასუხი ჩადენილი დანაშაულებისთვის? მაშინ გამოუშვან გარეთ და ერთი ერთში შევხვდები, პირობას ვიძლევი, რომ გავუსწორდები. ეს კაცი ქართველმა ერმა უნდა დასაჯოს. რატომ ჩააალპო ჩემი 18 წლის შვილი მიწაში, რატომ ჩაალპო ზურა, სანდრო, გიორგი და რომელი ერთი ჩამოვთვალო. გეკითხებით, არ უნდა აგოს პასუხი? მეცოდება ის ქართველი, ვინც დღეს მის დამცველად გამოდის”, – აცხადებს რობაქიძე.
შეგახსენებთ, რომ საქართველოს მესამე პრეზიდენტი მიხეილ სააკაშვილი თბილისის ერთ-ერთ უბანში პირველ ოქტომბერს დააკავეს. 2004 წელს მოკლული ბუტა რობაქიძის ოჯახი შვილის მკვლელობაზე პასუხისმგებლობას მიხეილ სააკაშვილს აკისრებს.
კომენტარები