“ბრიტანელი ანალიტიკოსები ომის ბოლო ფაზად ყირიმის გათავისუფლებას ასახელებენ” – კობერიძე

– ბოლო 24 საათია ძალიან მძიმე ბრძოლა მიმდინარეობს ხარკივის რაიონის სამხრეთით, იზუმი-ბარვინკოვოს გზაზე, სოფელ რიდნესთან. რუსულმა სატანკო ნაწილებმა გარკვეულწილად გაშლა მოახერხა, თუმცა ისე მიიწევდნენ წინ, რომ გზას დიდად არ დაშორებიან. უკრაინულმა არტილერიამ ბოლო დღეების ყველაზე ინტენსიური იერიში მიიტანა რუსულ სატანკო ნაწილებზე და მათი უმრავლესობა სრულად გაანადგურა. შედეგად, რუსული შეტევა შეჩერებული, იერიში კი მოგერიებული. ამასთან, რელიეფი სავსეა საარტილერიო ჭურვებისაგან წარმოშობილი კრატერებით, რაც მექანიზებულ ნაწილებს საველე გადაადგილებას კიდევ უფრო ურთულებს – გზაზე დაბრუნება კი უეჭველი სრული განადგურების ტოლფასი იქნება. ამის ფონზე აშკარაა, რომ იზიუმისაკენ სიტუაცია დასტაბილურდა და მალე კონტრშეტევის შანსიც შეიძლება გაჩნდეს.

– საარტილერიო ცეცხლმა გაანადგურა რუსების დროებითი სამხედრო შტაბი იზიუმთან ახლოს. იქვე რუსების კიდევ ერთი გამანადგურებელი Su-34 ჩამოაგდეს.

– საბრძოლო ოპერაცია გრძელდება ქალაქი ხარკივის შემოგარენშიც. უკრაინელებმა კიდევ უფრო ღრმად შეიწიეს რუსეთის საზღვრისაკენ და მოწინააღმდეგის საარტილერიო პოზიციები გაანეიტრალეს. ეს ის პოზიციებია, რომლიდანაც ხარკივს ბომბავდნენ (სამწუხაროდ, ნაწილი რუსეთის ტერიტორიაზეა და იქიდან ესვრიან ქალაქს). ბოლო სამი დღეა უკრაინელები ინტენსიურად მიიწევენ რუსეთის საზღვრისაკენ.

– დღეს დილით რუსებმა მარიუპოლში “აზოვსტალზე” იერიში სცადეს. ქარხანასთან მიახლოებისას უკრაინელებმა ინტენსიური ცეცხლი გახსნეს. იმდენად ქაოსურია რუსულ ნაწილებში სიტუაცია, რომ უკან დახევისას რუსებმა თავის სამხედროებს ესროლეს. ამასთან, როგორც ჩანს “აზოვსტალში” ანტისატანკო იარაღიცაა, რაც რუსული ჯავშანტექნიკის მიახლოებას კიდევ უფრო ართულებს. მარიუპოლში მსხვერპლი რუსულ რიგებში კვლავ მზარდია.

დღეს მარიუპოლის უკრაინელი მცველები ჩაერთნენ CNN-ს და განაცხადეს, რომ “აზოვსტალში” 60 ბავშვი, მათ შორის ერთი 4 თვის ჩვილია. არიან ექიმები, ოჯახის წევრები, მეომრები და ყველა, ვინც რუსებთან ჩაბარება არ ინება. თუმცა მათივე განცხადებით იმედი კვლავ არავის გადაუწურავს და არსებობს მოლოდინი, რომ უკრაინელები დაიწყებენ კონტრიერიშს და მარიუპოლის დარჩენილი ნაწილის ალყას გაარღვევენ.

– საოცრად კარგად მუშაობენ უკრაინული დრონები. საუბარი არ მაქვს მხოლოდ “ბაირაქტერებზე”, არამედ ჩვეულებრივ დრონებზე, რომლებიც ერთის მხრივ აზუსტებენ რუსების პოზიციების კოორდინატებს (რომელთაც მოგვიანებით არტილერია ანადგურებს), ხოლო მეორეს მხრივ მათზე დამაგრებული ანტისატანკო RKG-3 ყუმბარებით ზემოდან ხვრეტენ რუსულ ჯავშანს. პრაქტიკულად რამდენიმე ათეული დოლარის შეიარაღებით ანადგურებენ რამდენიმე მილიონიან ტექნიკას. გარდა ყველაფრისა, ეს ფსიქოლოგიური შოკის ეფექტადაც მუშაობს. საბრძოლო დრონის პოვნა და განადგურება შეიძლება უფრო ადვილი იყოს რუსებისათვის, ვიდრე მცირე დრონის.

– სიტუაცია კვლავ მძიმეა ლუგანსკის რაიონში. თუმცა უკრაინული საარტილერიო ცეცხლის ფონზე (წინა პოსტში ვიდეო დევს) რუსების სამხედრო მხარდაჭერამ და მომარაგებამ იკლო, რის შედეგადაც სიტუაცია თანდათან სტაბილურდება ამ მიმართულებითაც.

– ლუგანსკის რაიონში ზოგიერთმა ადგილობრივმა მთავრობის წარმომადგენელმა ქალაქების დაკავების შემდეგ რუსებთან თანამშრომლობა დაიწყო. თუმცა ერთ-ერთი მათგანი 25 აპრილს ნოვოაიდარიდან რუსებთან შეხვედრიდან გამოსული გაუჩინარდა დღეს კი მოკლული იპოვეს. ყველა კოლაბორაციონისტისათვის მაგალითი იქნება ეს ამბავი. უკრაინული წინააღმდეგობის მოძრაობა თანდათან კიდევ უფრო გაიშლება.

– დღეს უკრაინაში დიდი რაოდენობით პოლონური იარაღი და საბრძოლო ტექნიკა ჩავიდა. მათ შორის 230 ტანკი. ეს ყველაფერი კი მხოლოდ დასაწყისია.

– ბრიტანელები სიტუაციის შეფასებისას ამბობენ, რომ რუსების სამხედრო ნაწილები ძალიან ცუდად არიან გაწვრთნილები. ისინი დაკავებულ ტერიტორიაზე მარადიორობენ, სვამენ და აუპატიურებენ, ხოლო საბრძოლო ოპერაციებისას უკან დეზორგანიზებულები არიან და ქაოსურად იხევენ უკან. ოფიცრების უმეტესობა ამაზე უარეს მაგალითს იძლევა. საბოლოოდ კი დემორალიზება ანგრევს რუსულ პოზიციებს. მეტიც, ბრიტანელი ანალიტიკოსები ომის ბოლო ფაზად ყირიმის გათავისუფლებას ასახელებენ.”