სინდისის პატიმარი ანტონ ჩეჩინი ციხიდან გამოგზავნილ წერილში საქართველოს მოქალაქეებს მიმართავს
ყველას გამარჯობა! დიდი ხანია არ მომიწერია, არ ვკარგავდი სამართლიანი სასამართლოს იმედს. არ გამოვიდა ისე, როგორც მინდოდა…
ლევან ხაბეიშვილი უნდა გათავისუფლდეს! ეს აბსურდული დაკავება გამოწვეული იყო „ქართული ოცნების“ შიშით. ეს კი იმას ნიშნავს, რომ ყველაფერს სწორად ვაკეთებთ. გაერთიანების დროა, პარტიის ნომრის მიუხედავად. ბორენკა სპეცრაზმს ამზადებს 4 ოქტომბრისთვის, მე კი ვიმედოვნებ, რომ ამ დღეს საქართველოს არმია საერთაშორისო კონვენციების თანახმად, მშვიდობიან მოსახლეობას დაიცავს და წინააღმდეგობას გაუწევს არალეგიტიმური მთავრობის არაკანონიერ ქმედებებს! ქოცებმა დაამტკიცეს, რომ მოქმედებენ ყველაზე დამამცირებელი მეთოდებით, არა მხოლოდ ოპოზიციის, არამედ საქართველოს მოქალაქეების, უბრალო აქტივისტების წინააღმდეგაც. შეუძლიათ ქალების, ხალხის ცემა და ყველანაირი კანონის მიღება, რომლის მიღებაც შეიძლება თუ არ შეიძლება.
სამართლიან არჩევნების ლოდინი არ ღირს, ისინი ძალით ეცდებიან ძალაუფლების შენარჩუნებას. 4 ოქტომბერს ამ ყველაფერს წერტილი უნდა დაესვას: რეპრესიებს, კორუფციას, ანტიამერიკულ და ანტიევროპულ ვექტორს, პრორუსულ კურსს, სიღარიბეს და ა.შ.
ახლა თუ ვერ მივაღწევთ გამარჯვებას ამ ბოროტებაზე, დროთა განმავლობაში უარესი იქნება: სანქციები, უვიზო რეჟიმის დაკარგვა, არჩევნების გაუქმება, კონსტიტუციის ცვლილება, მოქალაქეების თავისუფლების შემზღუდველი კანონების მიღება, რუსეთის ფედერაციასთან შეერთება.
„ქართულმა ოცნებამ“ სპეციალურად ჩაგვსვა ციხეში რუსეთის 3 მოქალაქე. მათ არ ეგონათ, რომ თქვენ მხარს დაგვიჭერდით. ამასთანავე, მათ უნდოდათ იმის დამტკიცება, თითქოს რუსეთის მხარეს არ იჭერენ. ხოლო 3 ქართველის გამოშვებით იმის ჩვენება სურდათ, რომ მათი სასამართლოები ობიექტური და სამართლიანია. ეს ასე არ არის! ჯვებე ნაჭყებიამ და ნინო გალუსტაშვილმა წინასწარ მომზადებული განაჩენები წაიკითხეს, არც კი უსმენდნენ საბოლოო სიტყვებს. განაჩენები სხვა ადამიანებმა მოამზადეს და არა მოსამართლეებმა. არჩილ ნაცვლიშვილი აქტივისტების ბევრ საქმეში ფიგურირებს. მე ის შევნიშნე 11 პირის საქმეშიც სერგეი კუხარჩუკთან. თარჯიმანი შორენა ტაბატაძე ციხეში უნდა იყოს ცრუ ჩვენებების გამო!
სამს მოგვისაჯეს 8 წელი და 6 თვე მისი ტყუილების გამო. ის მუშაობს ზუსტად ისევე, როგორც პოლიციელები, ვინაიდან, მისივე სიტყვებით, მათ მეგობრული ურთიერთობები აქვთ. ისინი ერთად სადილობენ და ვინ იცის, კიდევ რა ხდება მათ შორის.
შმაგი გობეჯიშვილი და ნუგზარ ჭიტაძე კარგი წყვილია. იმედი მაქვს, რომ მათთვის უვიზო რეჟიმი არ აღდგება. ისინი უნდა გაასამართლოს საერთაშორისო სისხლის სამართლის სასამართლომ ადამიანის უფლებების დარღვევისთვის.
მოგვწერეთ მეტი წერილი ციხეში, არ დაგვივიწყოთ. ეს ჩვენი საერთო ბრძოლაა.
თავისუფლება პოლიტპატიმრებს!
თავისუფლება მედიას!
თავისუფლება საქართველოს!
4 ოქტომბერს მხოლოდ გამარჯვება!, – წერს ჩეჩინი.
დღეს ანტონ ჩეჩინი 27 წლის გახდა. აქციების დროს ნარკოდანაშაულის ბრალდებით დაკავებულ ანტონ ჩეჩინს 8 წლითა და 6 თვით თავისუფლების აღკვეთა მიუსაჯეს.
კომენტარები