“ბევრ ქვეყანას აქვს მოსმენის საშუალება, უნდა დადგინდეს, ვინ უსმენდა, როგორ უსმენდა” – ღარიბაშვილი ტოტალურ მოსმენებზე

პრემიერი, ირაკლი ღარიბაშვილი ჟურნალისტებს პასუხობს და კითხვას, აზიანებს თუ არა, მოსმენების შესახებ გავრცელებული ინფორმაცია ქვეყნის იმიჯს, ასე პასუხობს:

“ქვეყანას აზიანებს ეს აჟიოტაჟი, რომელიც არჩევნებისთვის, პოლიტიკური მიზნებისთვისაა შექმნილი, აზიანებს, მთელი ეს ქაოსი და აურზაური. ეს უნდა დადგინდეს, ვინ უსმენდა, როგორ უსმენდა, უსმენდა, თუ არა. ბევრ ადამიანს, ბევრ ქვეყანას აქვს მოსმენის საშუალება.

გამოძიება დაწყებულია და ყველაფერი გაირკვევა.

არჩევნები ძალიან მალე დასრულდება, მთელი ეს მძიმე კამპანია რომელიც მიმართული იყო ეკლესიის, მთავრობის და ახლა უკვე დიპლომატების წინააღმდეგ, ერთი პოლიტიკური პარტიის ვიწრო ინტერესებს ემსახურება და გვახსენებს იმას, რომ ამ ადამიანებს ქვეყანა არ უყვართ.

სააკაშვილმა ჯერ კიდევ აგვისტოში დაანონსა მძიმე კადრები, ალბათ, ნარკოტიკული თრობის ქვეშ იყო და თავი ვერ შეიკავა, ეს პროვოკაცია მან დაანონსა პირადად. ეს ტყუილ-მართალი აღრეული მაგიტომ არის, რომ ძნელი იყოს სიმართლის დადგენა, ამდენი, ათასობით ფაილის ავთენტურობის შესწავლას სჭირდება დრო. იცოდნენ, რომ არჩევნებამდე ვერ მოესწრებოდა. სუსი იმიტომ ჰყავს სახელმწიფოს, რომ კანონით დადგენილ ფარგლებში, ახდენს მოსმენებს და მთელი მსოფლიო ასე იმართება. აქედან, რა არის კანონიერი და არ არის კანონიერი, ამას სჭირდება შესწავლა, დრო სჭირდება, 2 კვირაში ამას არჩევნებამდე, ვერც ერთი ექსპერტიზა მოასწრებს. ეკლესიას და მთავრობას გვაქვს მტკიცე ერთობა და ამ ერთობას ვერავინ დააზიანებს. “