“ბექა ოდიშარიას კერძო მევახშეობის პორტფელი უფრო საყურადღებოა” – შოთა დიღმელაშვილი

სამოქალაქო აქტვისტი, შოთა დიღმელაშვილი:

უნამუსო გამსესხებლები და არაინფორმირებული მსესხებლები ყველგან არიან, თუმცა ცივილიზებულებაზე პრეტენზიის მქონე სახელმწიფოებში გამსესხებლის უფლებებისა და მსესხებლის საჭიროებების დაბალანსებას ცდილობენ.

შესაბამისი კანონმდებლობა არსებობს ფინანსური სექტორის მექაში და მედინაშიც, აშშ-ში და დიდ ბრიტანეთში:

აშშ-ში სხვადასხვა საშტატო ადგილობრივი რეგულაციების გარდა, რომლებიც პროცენტების ჭერს განსაზღვრავს დრაკონული გარიგებებისგან დასაცავად, არსებობს აგრეთვე ფედერალური, ე.წ. დოდ-ფრანკის აქტი და მომხმარებელთა ფინანსური დაცვის ბიურო (CFPB), რომელიც მომხმარებლებს იცავს უსამართლო და მტაცებლური პრაქტიკებისგან.

დიდ ბრიტანეთი FCA-ს საშუალებით გამსესხებლებს მთელ რიგ რეგულაციებს უწესებს მტაცებლური სესხების წინააღმდეგ. აგრეთვე, არსებობს სამომხმარებლო სესხის აქტი, რომელიც მსესხებელსა და გამსესხებელს შორის ურთიერთობაში სასამართლოს ჩართვას და მტაცებლური სესხის შემთხვევაში გამსესხებლის დასჯას ითვალისწინებს.

ორივე ქვეყანაში ხელმისაწვდომია უფასო დახმარებისა და საკონსულტაციო სერვისები ცუდ მდგომარეობაში აღმოჩენილი მსესხებლისთვის.

ეს ყოველივე იქ, სადაც “კაპიტალიზმი მოიგონეს”. ხოლო ევროკავშირში, რომლის წევრობაც გვინდა, კონკრეტული ეროვნული კანონმდებლობების გარდა, უამრავი დირექტივაა, რომლებიც სესხებზე საერთო სტანდარტებს აწესებს. ცალკე დირექტივაა მიძღვნილი ხელშეკრულებების უსამართლო პირობებისთვის, არსებობს ცალკე რეგულაციური პაკეტი საკრედიტო და ფინანსური ინსტიტუტებისთვის და დავის გადაწყვეტის სპეციალური მექანიზმები სასამართლოში და მის მიღმა.

საქართველოში ამ მხრივ სრული განუკითხაობაა და კანონმდებლობა მორგებულია მტაცებლური პრაქტიკების გამტარებელთა ინტერესებს. რაც გასაკვირი არ არის, რადგან უამრავი მოქმედი მილიონერი პარლამენტარი ოფიციალურად არის ჩართული კერძო მევახშეობაში.

ათასი შავბნელი კანონმდებლობის ინიციატორ ისკო დასენს ყველა იცნობთ, შედარებით ნაკლები – დიდუბის მაჟორიტარ ივლიანე წულაიას, რომელსაც ოფიციალურად 10 მილიონი დოლარი ჰქონდა გასესხებული. ბექა ოდიშარიაც ხანდახან ამოტივტივდება ხოლმე, მეტწილად იმის გამო, რომ ფეისბუქზე ხალხს აგინებს, არა და მისი კერძო მევახშეობის პორტფელი უფრო საყურადღებოა.

ცნობისთვის, გამოცემა “პუბლიკას ინფორმაციით, 2017 წელს შევსებულ დეკლარაციას თუ შევხედავთ, დეპუტატმა ბექა ოდიშარიამ 2016 წელს სესხად გასცა 170 000 დოლარი, საიდანაც სარგებლის სახით წლის განმავლობაში 24 724 დოლარი მიიღო. 2017 წლის 1 იანვარს ბექა ოდიშარიამ 2 წლის ვადით გაასესხა 270 000 დოლარი, თუმცა ახალ დეკლარაციაში ამ თანხის გასესხების შედეგად მიღებული სარგებელი არ არის მითითებული.