ბათუმში კორინავირუსის მე-9 შემთხვევა დაფიქსირდა, ინფექცია -60 წლამდე ასაკის ქალს დაუდასტურდა. იგი საქართველოში ერთი კვირის წინ თურქეთიდან შემოვიდა და თვითიზოლაციაში იმყოფებოდა.
აჭარის ჯანდაცვის მინისტრის განცხადებით, აღნიშნულ პირს საზღვრის კვეთისას ტემპერატურა არ აღენიშნებოდა თუმცა ის მაინც საკარანტინე სივრცეში მოათავსეს, გუშინ საღამოს კი 60 წლამდე ქალი ტემპერატურის მატების გამო ცხელების ცენტრში გადაიყვანეს. მისი მდგომარეობა ამ დროისთვის დამაკმაყოფილებელია.
„ის საქართველოში თურქეთიდან, სარფის გავლით შემოვიდა. ადგილზე არ აღენიშნებოდა ცხელება, თუმცა როგორც ყველა ასეთ შემთხვევაში, გადაყვანილ იქნა კარანტინში და სიმპტომები დაახლოებით შვიდი დღის შემდეგ გამოუვლინდა. პაციენტი კლინიკა „მედალფაშია“ გადაყვანილი და მისი ჯანმრთელობის მდგომარეობა სტაბილურია. ქალბატონი თურქეთიდან მარტო დაბრუნდა და ოჯახის წევრებთან კონტაქტი არ ჰქონია“, – განაცხადა ზაალ მიქელაძემ.
ბოლო 24 საათში აჭარაში ახალ კორონავირუსზე 36 პაციენტი გამოიკვლიეს, აქედან 35-ს ინფექცია არ დაუდასტურდა. ბათუმში, კლინიკა „მედალფაში“ ამჟამად რვა ინფიცირებული იმყოფება.
კომენტარები