თბილისში, ბარათაშვილის ქუჩაზე დღეიდან ზონალურ-საათობრივი პარკირების სისტემა ამოქმედდება. ამ ქუჩაზე 65 საპარკინგე ადგილით ხუთი ლოკაციაა გამოყოფილი, სადაც ავტოსატრანსპორტო საშუალების პარკირება ფასიანი იქნება (ერთი საათი – ერთი ლარი).
„დღეიდან ბარათაშვილის ქუჩაზე ზონალური პარკირების მომდევნო ეტაპი განხორციელდება და პარკირება ფასიანი გახდება. მოსახლეობისთვის აღნიშნული პარკირება 100 მეტრის რადიუსში არის უფასო, სადაც განთავსებული იქნება ჯიხური, სადაც მოსახლეობა რეგისტრაციის გავლას შეძლებს და უფასო კონსულტაციას მიიღებს. ასევე, შეეძლებათ რომ დარეგისტრირდნენ ვებგვერდზე www.parking.tbilisi.gov.ge. ზონალური პარკირება ამჟამად ზონალურ-საათობრივი პარკირება კოტე აფხაზისა და აბანოს ქუჩების ნაწილზე, ასევე, ორბელიანის მოედნის მიმდებარედ მოქმედებს, დღეიდან კი ბარათაშვილის ქუჩაც დაემატება“ , – განაცხადა თბილისის ტრანსპორტის განვითარების სამსახურის ხელმძღვანელმა ვიქტორ წილოსანმა.
ზონალური პარკინგის ადგილებზე ავტომობილის მფლობელებს შესაძლებლობა ექნებათ, სატრანსპორტო საშუალება 15 წუთით უფასოდ (სხვადასხვა ლოკაციაზე დღეში ოთხჯერ) გააჩერონ. ასევე, გამოყოფილია უფასო ადგილები ტაქსის მძღოლებისთვის და შშმ პირთათვის. პარკირების საფასურის გადახდა ელექტრომობილების მფლობელებზე არ ვრცელდება და მათთვის აღნიშნული სერვისი უფასოა. ზონალური პარკირებისთვის, ბარათაშვილის ქუჩის ჩათვლით, სულ 478 ადგილით 56 ლოკაციაა გამოყოფილი.
კომენტარები