“აცრა სავალდებულო უნდა გახდეს ზოგიერთი კატეგორიის ადამიანებისათვის – სხვა გამოსავალი არა ჩანს” – გოცირიძე

“ენმ”-ის წევრი, რომან გოცირიძე:

“ვაქცინაციის ტემპმა მკვეთრად იკლო, განსაკუთრებით პირველადი აცრების რაოდენობამ. ეს ისევ თავმოუბმელობის შედეგია. როცა დღეში 2 ათასი აცრა კეთდებოდა, მოვუწოდებდით მთავრობას, რომ გაეფართოვებინა აცრის პუნქტები და გამოეყენებინა მობილური ჯგუფები. დიდი დაგვიანებით ეს გაკეთდა და დღიური აცრების ოდენობამ 25 ათასს მიაღწია. ახლა თითქმის განახევრდა.

სხვა გამოსავალი არა ჩანს-აცრა სავალდებულო უნდა გახდეს ზოგიერთი კატეგორიის ადამიანებისათვის.

საფრანგეთში ექიმების აცრა სავალდებულო გახდა. რამდენიმე დღის წინ 3 ათასი სამედიცინო მუშაკი დაითხოვეს სამსახურიდან აუცრელიბის გამო.

ეს არაა ადამიანის პირადი თავისუფლების შეზღუდვა ან დისკრიმინაცია. მისი უფლებაა აიცრება თუ არა, ისევე როგორც დამსაქმებლის უფლებაა ( ვალდებულებაც) დაიცვას მისი თანამშრომლებისა და პაციენტების სიცოცხლე და ჯანმრთელობა.

როდესაც 8 ათასი ადამიანი მოკვდა ამ პატარა ქვეყანაში და იმუნიზაციის არსებული ტემპის შენარჩუნების შემთხვევაში კიდევ ბევრი მოკვდება, ადმინისტრაციული შეზღუდვების საწინააღმდეგო რაღაც ყურით მოთრეული არგუმენტები არის არაჰუმანური და დემაგოგიური.

სიცოცხლის უფლება ერთ-ერთი ფუნდამენტური და აბსოლუტური უფლებაა.

სიცოცხლის უფლება ერთი მხრივ სახელმწიფოს ადამიანის სიცოცხლის ხელყოფას უკრძალავს (ნეგატიური ვალდებულება), მეორე მხრივ მისი სიცოცხლის აქტიურად დაცვას ავალდებულებს (პოზიტიური ვალდებულება).

კარგი მმართველობის პირობებში ადამიანის სიცოცხლისა და ჯანმრთელობის დაცვა შესაძლებელია ნაკლები შეზღუდვებით და მკაცრი ადმინისტრაციული ზომების გამოყენების გარეშე. ჩვენი ხელისუფლება კარგი მმართველობის ნუმუში რომ არ არის, ეს უკვე ყველამ იცის. როცა სხვა გამოსავალი არ არის, მსგავსი მეთოდების გამოყენება აუცილებელია.”