აშშ-ში ბრალი წაუყენეს რუს ანალიტიკოსს, იგორ დანჩენკოს, რომელმაც გამოძიების ფედერალურ ბიუროს (FBI) დონალდ ტრამპის რუსეთთან კავშირებზე დოსიესთან დაკავშირებით ცრუ ინფორმაცია მიაწოდა.
აშშ-ის იუსტიციის დეპარტამენტის განცხადებით, იგორ დანჩენკოს ბრალად ედება FBI-სთვის ცრუ ინფორმაციის მიწოდება, რომელიც იმ მასალების წყაროებს ეხებოდა, რომელიც მან ბრიტანულ საგამოძიებო ფირმას მიაწოდა, რომელმაც თავის მხრივ დონალდ ტრამპის რუსეთთან კავშირებზე დოსიე მოამზადა.
კერძოდ, 2017 წლის ივნისიდან ნოემბრამდე პერიოდში იგორ დანჩენკომ ცრუ განცხადებები გააკეთა გარკვეული ინფორმაციის წყაროებთან დაკავშირებით, რომელიც მან ბრიტანულ საგამოძიებო ფირმას მიაწოდა.
აღნიშნული ინფორმაცია აშშ-ის ყოფილი პრეზიდენტის რუსეთთან შესაძლო კავშირებზე დოსიეში მოხვდა, რომელიც შემდეგ გამოძიების ფედერალური ბიუროს გადასცეს.
დოსიე, რომელიც FBI-სა და ამერიკულ მედიასაშუალებებში 2016 წლის ნოემბრის არჩევნებამდე გავრცელდა, დღემდე დაუმტკიცებელ მტკიცებებს შეიცავდა, რომ რუსეთს კომპრომატი ჰქონდა დონალდ ტრამპისა და მისი საარჩევნო კამპანიის ზოგიერთი წევრის შესახებ და რომ მოსკოვი კულისებს მიღმა მის გამარჯვებაზე მუშაობდა.
აშშ-ის იუსტიციის დეპარტამენტში აღნიშნავენ, რომ იგორ დანჩენკომ ცრუ განცხადებები გააკეთა იმ ინფორმაციის შესახებ, რომელიც მისი თქმით, მან ანონიმური წყაროსგან მიიღო, რომელიც ამტკიცებდა, რომ კრემლმა, შესაძლოა, ტრამპს გამარჯვებაში დაეხმარა. გამოძიების განცხადებით, იგორ დანჩენკომ იცოდა, რომ აღნიშნული ინფორმაცია სიმართლეს არ შეესაბამებოდა.
გამოძიება ასევე მიიჩნევს, რომ იგორ დანჩენკო დოსიეს შედგენაში მონაწილეობდა, ხოლო შემდგომში გამოძიების ფედერალურ ბიუროს არ გაუმხილა თავისი კონტაქტები „დემოკრატიულ პარტიასთან“ დაკავშირებულ პირთან.
კომენტარები