ექიმი ნანა გეგეჭკორი:
,,ღრმა ბავშვობის ამბავია, მაგრამ ნათლად მახსოვს ილორის ეკლესიაში ნანახი სცენა…
ჩემთვის ძალიან ძვირფას ადამიანს, მაშინ სრულიად ახალგაზრდას, ჯანმრთელობის უკიდურესად მძიმე პრობლემა ჰქონდა. ოჯახის მოხუცი წევრები არ იჯერებდნენ, რომ პრობლემა რეალური ავადმყოფობა იყო. სოფელიც მთელი ძალით ამტკიცებდა მათ რწმენას და ათასგვარი რიტუალით ცდილობდა “ბატონების დამშვიდებას”.
წლები გადიოდა, დაჰყავდათ “გამომლოცველები”… აი ისინი კულტურულ მემკვიდრეობად რომ გამოაცხადა სახელმწიფომ.
ახალგაზრდა ბიჭი წლიდან წლამდე მძიმდებოდა. არ ნებდებოდა ოჯახი და ახალ ახალ რიტუალებს უწყობდა “ბატონებს”, რომ როგორმე დაემშვიდებინათ და გაცლოდნენ ბიჭს. მოხუცები არ ნებდნებოდნენ. ოჯახის ახალგაზრდა წევრების რწმენა, რომ ბიჭი მეცნიერებას უნდა მინდობოდა, არასდროს იქნა გათვალისწინებული.
ერთხელაც მორიგ რიტუალს შევესწარით ილორის ეკლესიაში. ამჯერად “ბატონების” გამოლოცვაში (მეგრულად “გუთოხვამუას” ალბათ ეს თარგმანი უხდება) ილორის ეკლესიის მღვდელი იყო ჩართული. მისი მოთხოვნით ოჯახს სპეციფიური მახასიათებლების თხა ჰყავდა მოყვანილი შესაწირად. ცხადია, თხას თან ფულადი შესაწირი და მეგრული სუფრის ყველა ატრიბუტი ერთვოდა, სპეციალური წესით რძეში მოხარშული ყველიანი კვერების ჩათვლით.
მოძღვარი რიტუალის შესრულებას შეუდგა. ჩემთვის და ალბათ სხვებისთვისაც გაუგებრად ბურტყუნებდა. თვითონ ლოცვად მოიხსენიებდა ამ ბურტყუნს. მჯერა, არც ერთი ლოცვის ერთი ფრაზაც არ ეცოდინებოდა ზეპირად. ამიტომაც ისე ბურტყუნენდა, რომ სხვებს რაღაც განსაკუთრებული, პროფესიული ენა ჰგონებოდათ.
რამდენიმე ტონალობაში ბურტყუნის შემდეგ გამოაცხადა, ახლა დააკვირდით თხა როგორ დამიმოწმებს რომ ნამდვილად დავამშვიდე “ბატონები” და ბიჭის სხეული უკვე დატოვესო. საცოდავ ცხოველს ზურგზე ცივი წყალი გადაასხა, იმანაც გაკვირვებულმა გაიფანტა სიცივე. ამაყად გასწორდა წელში მოძღვარი მისი წარმოდგენის უტყუარობაში თხადამოწმებული. დიდხანს არ გასტანა ტრიუმფით ტკბობამ. დედამ გადაასხა ცივი წყალი, კითხვით, ნუთუ გჯერათ ამ სისულელის, ცივი წყალი რომ გადაგასხან თქვენც ხომ უნებურად აფართხალდებით?.. არ მახსოვს უხერხულმა სიჩუმემ რამდენხანს გასტანა.
“ბატონები” ვერ დაამშვიდა ილორის ეკლესიის მოძღვარმა. ოღონდ, ეს მისი უმეცრებით კი არა, დედას გონიერი კითხვით ჩაშლილი რიტუალით აიხსნა.
ბიჭი კიდევ ბევრი წელი ტანჯეს “ბატონებისთვის” ნამღერი ტაშ-ფანდურით. ახალგაზრდა გარდაიცვალა მოულოდნელად. სიკვდილის უშუალო მიზეზი სხვა დაავადება იყო, თუმცა სასიკვდილო მიზეზამდე სწორედ არანამკურნალებმა ძირითადმა პრობლემამ მიიყვანა. ძალიან ძვირფასი დრო დაკარგა ოჯახმა ბიჭის გადასარჩენად. დროის კარგვის ამ სიგიჟეს კი ახლა კულტურული მემკვიდრეობის სტატუსი მიენიჭა… სინამდვილეში ფსიქიატრიული პრობლემა ჰქონდა. მოგვიანებით ექიმები ჩაერთვნენ მკურნალობაში, მაგრამ ძალიან დაგვიანებული იყო.
ასე, სიმღერით ვერდამშვიდებული “ბატონებით” შეიწირეს უკეთილშობილესი ახალგაზრდა უმეცარმა ადამიანებმა…
კომენტარები