ნაციონალურ მოძრაობას ერთ-ერთი ახალგაზრდული მოძრაობა – „თავისუფალი ზონა“ დაეშალა. ამის შესახებ „პრაიმტაიმს“ ინფორმირებული წყარო უამბობს.
„სატელეფონო მოკლე ტექსტური შეტყობინება მოგვივიდა „თავისუფალი ზონის“ წევრებს, რომ უკანასკნელი სხდომა ხვალ გაიმართება და დავიშლებით. ამის მიზეზად კობა ხაბაზი მოსახლეობაში ჩვენს უნდობლობასა და არაავტორიტეტულობას ასახელებს.
ვინც პოლიტიკურად აქტიურები ვართ, ცალკე მოძრაობებს შევქმნით და არსებულ სხვადასხვა ახალგაზრდულ ორგანიზაციებს შევუერთდებით.
ჩვენ ბევრი რამ გავაკეთეთ, პირველები ვიყავით, ვინც ყველაფერზე მივდიოდით, მაგრამ ხაბაზმა ასე გადაწყვიტა და გული გვწყდება. თუმცა, შემოგზავნილიც ბევრი იყო, ინფორმაციები გაედინებოდა, მაგრამ „თავისუფალი ზონის“ დაარსების დღიდან ვინც ერთგულად ვმუშაობდით, ასე ძაღლებივით ხაბაზს არ უნდა გავეყარეთ. – ამბობს მოძრაობის ერთ-ერთი წევრი.
თავად კობა ხაბაზი „პრაიმტაიმთან“ ორგანიზაციის დაშლის შესახებ ინფორმაციას არ ადასტურებს, თუმცა აცხადებს, რომ ის პლატფორმად გადაკეთდება.
„თავისუფალი ზონა“ ისევ ისეთი აქტიური იქნება, როგორიც 2012 წლიდან არის და ყველა პროცესში მიიღებს მონაწილეობას. თუმცა, ის გახდება პლატფორმა რამდენიმე არასამთავრობო ორგანიზაციისთვის, რომელიც თავად „თავისფალი ზონის“ წევრებმა შექმნეს. ასეთი 6 არასამთავრობო ორგანიზაციაა, რომლებიც თავის მოქმედებებში თავისუფლები იქნებიან და ერთადერთი შეზღუდვა ექნებათ იმ შემთხვევებში, რაც ახალი პლატფორმის დებულებაში ჩაიწერება. ამდენად, ეს არის ახალი სიტყვა, რაც ვფიქრობთ, უფრო მეტად გაშლის ახალგაზრდულ მოძრაობას და უფრო გაააქტიურებს“ – განმარტავს კობა ხაბაზი.
შესაბამისად, თავად ხაბაზი დარჩება მხოლოდ პლატფორმა „თავისუფალი ზონის“ დამფუძნებლად, რომელიც იქ თავისი არასამთავრობო ორგანიზაციით გაერთიანდება და ამ პლატფორმაზე ერთ-ერთი, სხვებთან გათანაბრებულუფლებიანი წევრი იქნება.
წყარო: „პრაიმტაიმი“
კომენტარები