არ ვაპირებთ მიმართვების გაგზავნას საქართველოსა და ყაზახეთში რუსეთიდან წასული ჩვენი მოქალაქეების იძულებით დასაბრუნებლად – შოიგუ

ინტერფაქსის ცნობით, რუსეთის თავდაცვის სამინისტროში აცხადებენ, რომ არ აპირებენ მიმართვას ყაზახეთის და საქართველოს სახელმწიფო უწყებებისადმი ქვეყნიდან წასული რუსეთის მოქალაქეების იძულებით დასაბრუნებლად.

„რუსეთიდან წასული მოქალაქეების რუსეთში იძულებით დაბრუნების საკითხთან დაკავშირებით რუსეთის თავდაცვის სამინისტროს არ გაუგზავნია, არ მოუმზადებია და არ აპირებს არანაირი მიმართვების გაგზავნას საქართველოს, ყაზახეთის და სხვა ქვეყნების სახელმწიფო უწყებებში“, – აღნიშნავენ სერგეი შოიგუს უწყებაში.

რუსეთში ნაწილობრივი მობილიზაციის გამოცხადების შემდეგ მიგრაციის ახალი ტალღის მთავარ მიმართულებებად ყაზახეთი და საქართველო იქცნენ. ყაზახეთის შსს-ს ინფორმაციით, 21 სექტემბრიდან ქვეყანაში შევიდა რუსეთის 98 000 მოქალაქე, 64 000-მა კი ქვეყანა დატოვა. საქართველოს შსს-ს ცნობით, რუსეთში მობილიზაციის დაწყების შემდეგ საქართველოში ყოველდღიურად 5-6 ათასი შემოდიოდა, ახლა კი დაახლოებით 10 000 ადამიანი შემოდის, თუმცა შემოსული მოქალაქეების 60%-მა საქართველო უკვე დატოვა.