“არ დავუჭერთ მხარს კომისიის შექმნას… სააკაშვილის სიცოცხლეზე პასუხისმგებელია ოცნება” – გახარიას გუნდი

არაერთხელ გვითქვამს, რომ არ მივიღებთ მონაწილეობას ოცნების თამაშში, რომლის მიზანია, თავიდან აიცილონ პასუხისმგებლობა ქვეყანაში მათ მიერ შექმნილ პოლიტიკურ, მმართველობის თუ ეკონომიკურ კრიზისზე.

არ დავუჭერთ მხარს კომისიის შექმნას და ოცნების და ნაცმოძრაობის მიერ ისედაც ფუნქციადაკარგულ პარლამენტს კიდევ ერთხელ არ გადავაქცევთ ამ ორ პარტიას შორის ბრძოლის ველად. ეს ხელს შეუწყობს მხოლოდ ოცნებას, რომ მთელი ყურადღება გადატანილი იქნეს მიხეილ სააკაშვილზე და საზოგადოებას დაავიწყდეს ოცნების პასუხისმგებლობა – ქვეყნის სუვერენიტეტისთვის საფრთხის შემცველ განცხადებებზე და ქმედებებზე, მოშლილ კონსტიტუციურ წყობაზე, დასუსტებულ დემოკრატიაზე, გაუარესებულ ეკონომიკურ და სოციალურ მდგომარეობაზე. ეს არის ჩვენი პასუხისმგებლობა საქართველოს მოქალაქეების წინაშე.

ჩვენ არ ვაყენებთ ვიწრო პარტიულ ინტერესს წინ და საგამოძიებო კომისიის შექმნას არ ვითხოვთ უდანაშაულო აკაკი ბარათაიას და გელა აბულაძის საქმეებზე და მითუმეტეს, არ ვითამაშებთ ოცნების თამაშს სააკაშვილის საქმეზე.

აქვე, ნაციონალურმა მოძრაობამ შესანიშნავად იცის, რომ საგამოძიებო კომისიის შექმნით შეუძლებელია იმ მიზნის მიღწევა, რაც მათ უნდათ, მინიმუმ იმიტომ, რომ პარლამენტის რეგლამენტის მიხედვით, კომისიის საქმიანობა თვეები შეიძლება გაგრძელდეს. ერთადერთი მიზანი, რაც კომისიის შექმნით მიიღწევა – ოცნების დახმარებაა. ამიტომ, ნაცმოძრაობის მხრიდან წმინდა წყლის სპეკულაციაა (მათ შორის მათივე ამომრჩევლის წინაშე) ის, რომ კომისიის შექმნაზეა დამოკიდებული სააკაშვილის სიცოცხლე.

არაერთხელ გვითქვამს და კიდევ ერთხელ გავიმეორებ, სააკაშვილის მიმართ მართლმსაჯულების სათანადოდ აღსრულება ოცნების პასუხისმგებლობაა. სააკაშვილს აქვს ისეთივე უფლებები, როგორიც ყველა ბრალდებულს (მოსწონს ეს ვინმეს, თუ არა). მისი, როგორც ბრალდებულის, სიცოცხლეზე და ჯანმრთელობაზე პასუხისმგებელია ოცნება, ამ სიტყვების ყველანაირი მნიშვნელობით.

ამიტომ, დაამტკიცოს ოცნებამ, რომ მის ინტერესში არ შედის ეს გაუთავებელი მსჯელობები, სათანადო პასუხი გასცეს მისი ჯანმრთელობის მდგომარეობასთან დაკავშირებულ კითხვებს და დაასრულოს ყველანაირი სპეკულაციები.”