,,ანუ საქართველომ დაკარგა ერთი რუსთავის მოსახლეობა” – გიორგი მშვენიერაძე

იურისტი გიორგი მშვენიერაძე:

,,ქალაქ რუსთავის მოსახლეობა დაახლოებით 135 000 ადამიანია. რუსთავი სიდიდით საქართველოს მეოთხე ქალაქია.

ახლა წარმოიდგინეთ, რომ რუსთავი სრულად დაიცალოს და იქ აღარავინ ცხოვრობდეს. ანუ რუსთავის მოსახლეობა იყოს 0 – ხომ საშინელებაა?

აი, დაახლოებით ეს ხდება დღეს საქართველოში. 131.370-მა ადამიანმა დატოვა ჯამურად საქართველო ბოლო 6 წელში (იგილისხმება ემიგრაციაში წასული საქართველოს მოქალაქეებისა და უკან დაბრუნებული საქართველოს მოქალაქეების ჯამური უარყოფითი მიგრაციული სალდო).

ანუ, საქართველომ დაკარგა ერთი რუსთავის მოსახლეობა.

ჩვენნაირი პატარა სახელმწიფოსთვის ეს კატასტროფული მონაცემებია, თუმცა ეს იმ ხალხის ბრალი ნამდვილად არაა, ვისაც საკუთარი ოჯახების სარჩენად საზღვარგარეთ უწევთ გახიზვნა. ბევრს ალბათ კარგად ვერც წარმოუდგენია, რამხელა ტკივილთან არის ის ყველაფერი დაკავშირებული – დედები და მამები შვილებს წლობით ვერ ნახულობენ, მეუღლეები – ერთმანეთს, ოჯახები იხლიჩება.

ამის პარალელურად პროპაგანდა ამტკიცებს, რომ ქვეყანა მდიდრდება. სინამდვილეში, სახელმწიფო ემსახურება ივანიშვილის და მისი გარემოცვის გამდიდრებას, ხოლო ხალხი გაუსაძლის გაჭირვებას გაურბის.

კარგი ქვეყანა და ცუდი სახელმწიფო – ამასწინ შემხვდა საქართველოს ასეთი დახასიათება. ძნელია არ დაეთანხმო. არადა, შეგვიძლია ამ კარგ ქვეყანაში კარგი სახელმწიფოც გვქონდეს.“