“ანუ ხალხს ვეუბნებით, რომ აცრა კი არაა საჭირო, არამედ სიმღერით ეშველება ინფექციებსო?” – რომან გოცირიძე

სასაცილო კი არის, მაგრამ მავნებლობაც იკითხება ამ გადაწყვეტილებაში. ანუ ხალხს ვეუბნებით, რომ აცრა კი არაა საჭირო, არამედ სიმღერით ეშველება ინფექციებსო? კორონას რომ “ანადგურებდნენ” მღვდლები ნაკურთხი წყლის ქუჩებში პკურებით, ესეც ანტივაქსერობის წამახალისებელი რომ იყო, ხომ კარგად გამოჩნდა მერე? რომელ ქვეყანაში მოკვდა 17 ათასზე მეტი ადამიანი მოსახლეობის რაოდენობასთან შედარებით?

რაც შეეხება მცხეთის ღვეზელს, არ ვიცი ეს რა არის. სოკოთია, ლობიანით თუ ხორცით? ან რით გამოირჩევა იმ ღვეზელებისაგან, ჩვეულებრივ საცხობებში რომ იყიდება? ან ონიაშვილის ქუჩის ლობიანი რატომ არაა კულტურული მემკვიდრეობის ძეგლი? სხვაგანაც იყიდება მსგავსი ლობიანები და უკეთესიცო, იტყვიან კულტურის სამინისტროში. კი ბატონო, მაგრამ მათ ხომ პირველებმა გამოიჩინეს მარიფათი და სანამ ამდენი სუპერმარკეტი გაჩნდებოდა, ხომ შეგეძლოთ გეყიდა 6 ლარად მუყაოს გარეშე და 7 ლარად მუყაოს ყუთში? ახლა თითქმის სამჯერ მეტი რომ ღირს, მარტო ამისთვისაა დასახური ეს სამინისტრო-ეკონომიკის სამინისტროზე ვამბობ ახლა, თორემ კულტურის სამინისტრო და მისი მინისტრი დიდი ხანია დასახურია კულტურული მემკვიდრეობის განადგურების გამო ( მაგ. გელათი).

ამ ქრისტეშობა დღეებში პარლამენტის წინ აყუდებული ალტინფოს ჯვრის და ამ მის წინ პარლამენტის ბიუჯეტიდან ნაყიდი სასაჩუქრე კალათებით ალილოზე ატუზული დეპუტატების შეყვანა არ დაგავიწყდეთ კულტურული მემკვიდრეობის ძეგლთა სიაში.”