გორში, ე.წ. კომბინატის დასახლებაში საქართველოს მოქალაქეების, პაპუნა ლოცულაშვილს ცემის ფაქტზე 6 პოლიციელია დაკავებული.
განცხადება საქართველოს მთავარმა პროკურატურამ რამდენიმე წუთის წინ გაავრცელა. გვარაკიძის უწყება, სამართალდამცავებს სამსახურებრივი უფლებამოსილების ძალადობით გადამეტებას ედავება. [ადვოკატი მუხლის, წამების მუხლით გადაკვალიფიცირებას ითხოვს]
უწყების ცნობით, გამოძიებით დადგინდა, რომ “2026 წლის 27 მაისს, ქალაქ გორში, ბრალდებულებმა დაზარალებულის დაკავებისას, ძალადობით გადაამეტეს სამსახურებრივ უფლებამოსილებას”.
დანაშაული 5-დან 8 წლამდე თავისუფლების აღკვეთას ითვალისწინებს.
პროკურატურამ პოლიციელების მიერ სამსახურებრივი უფლებამოსილების ძალადობით გადამეტების ფაქტზე ექვსი პირი დააკავა.
შიდა ქართლისა და მცხეთა-მთიანეთის საოლქო პროკურატურის საგამოძიებო სამმართველოს მიერ, შინაგან საქმეთა სამინისტროს გენერალურ ინსპექციასთან კოორდინაციით ჩატარებული გამოძიებით დადგინდა, რომ 2026 წლის 27 მაისს, ქალაქ გორში, ბრალდებულებმა დაზარალებულის დაკავებისას, ძალადობით გადაამეტეს სამსახურებრივ უფლებამოსილებას. განხორციელებული ძალადობის შედეგად, არსებითად დაირღვა დაზარალებულის უფლებები, ამასთან დაზიანდა მისი ჯანმრთელობა.
უმოკლეს ვადაში ჩატარებული გამოძიების შედეგად მოპოვებულ მტკიცებულებათა საფუძველზე, ბრალდებულები 28 მაისს დააკავეს. მათ ბრალდება კანონით განსაზღვრულ ვადაში, სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით) წარედგინებათ, რაც სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს.
მაღალი საჯარო ინტერესიდან გამომდინარე, საზოგადოებას პერიოდულად მივაწვდით ინფორმაციას გამოძიების მიმდინარეობის შესახებ,” – წერია განცხადებაში.
პროკურატურა განცხადებაში არაფერს ამბობს, მეორე ნაცემ კაცსზე, ლაშა აბისონაშვილზე, რომელიც ანგარიშსწორების სამიზნე მას შემდეგ გახდა, რაც მეგობრის დახმარებას შეეცადა.
გორში, პოლიციელები ჯგუფურად 2 მოქალაქეს გუშინ, 27 მაისს, გაუსწორდნენ. ერთ-ერთ დაშავებულს, პაპუნა ლოცულაშვილს სამედიცინო დახმარება თბილისში გაუწიეს. მას ნეკნი აქვს მოტეხილი.
30 წლამდე კაცმა, რომელზეც სამართალდამცავებმა ფიზიკურად ჯგუფურად იძალადეს, კლინიკა “ვივა-მედი” რამდენიმე საათის წინ დატოვა.
ნაცემი ახალგაზრდა კაცის ადვოკატის განცხადებით, პაპუნა ლოცულაშვილი 353-ე მუხლით იყო დაკავებული, რაც გულისხმობს პოლიციის მუშაკების მიმართ წინააღმდეგობის გაწევას, მათი საქმიანობის შეწყვეტის მიზნით, ძალადობის მუქარით. ამჟამად კაცი სახლში იმყოფება, თუმცა მას სავარაუდოდ ბრალდების სტატუსი აქვს.
კომენტარები