“ამოატივტივა ღირებულებათა ის აჯაფსანდალი, რომელიც საუბედუროდ ე.წ. პრო-დასავლეთელების საერთო ქოლგის ქვეშ თუხთუხებს” – ზურაბ გურული

უკარგესი, სამაგალითო ახალგაზრდა კაცის უსასტიკესი მკვლელობის საქმემ და ამ ახალგაზრდა კაცის ასევე უკარგესმა და სამაგალითო დედამ გარდა იმისა, რომ წესიერი და პატიოსანი ახალგაზრდებისათვის უაღრესად საშიშ ქვეყანაში ძალიან საჭირო და პირდაპირი მნიშვნელობით არაერთი სიცოცხლის გადამრჩენი იურიდიული პრეცედენტი დააფუძნა, დამატებით, ზედაპირზე ამოატივტივა ღირებულებათა ის აჯაფსანდალი, რომელიც საუბედუროდ ე.წ. პრო-დასავლეთელების საერთო ქოლგის ქვეშ თუხთუხებს და რომლის გამოც პრაქტიკულად შეუძლებელია ოპოზიციური პოლიტიკური ძალების გაერთიანება ერთი მთავარი, უზენაესი ღირებულების პლატფორმაზე.

წამქეზებლის ადექვატური დასჯის პრეცედენტის დაფუძნებას მხოლოდ და მხოლოდ ერთი ქალბატონის შეუპოვრობას უნდა ვუმადლოდეთ და არა სახელმწიფოს, რომელმაც კრიმინალის მიმართ შემწყნარებლური პოლიტიკის მეშვეობით გახადა ქვეყანა საშიში წესიერი, კანონმორჩილი მოქალაქეებისათვის. რომ არა “გაგებით მოეკიდეთ!” პოლიტიკა, არც არასრულწლოვნების მძვინვარე ბანდა იპარპაშებდა ქვეყანაში და არც არანაირი პრეცედენტის შემოღება არ იქნებოდა საჭირო. ისევე როგორც მედიცინაში, დანაშაულის აღმოფხვრაშიც პრევენციას უჭირავს ყველაზე ეფექტური ადგილი და არა უკვე ჩამოყალიბებულ კრიმინალთან ბრძოლას.

რაც შეეხება დასავლურ ღირებულებებს, უნდა გავაცნობიეროთ ის ფაქტი, რომ დასავლეთი აღარ წარმოადგენს პრაქტიკულად ერთგვაროვან, ლიბერალურ-კონსერვატიულ სივრცეს, როგორსაც ვიცნობდით სსრკ-ს დანგრევამდე. თანამედროვე დასავლეთი დაყოფილია კომუნისტურ, სოციალისტურ, ნაციონალისტურ და კლასიკური ყაიდის ლიბერალურ-კონსერვატიულ ღირებულებებად.

შესაბამისად, ქართული პრო-დასავლური ფრთაც ანალოგიურ სპექტრებად არის დაყოფილი და ბუნებრივია, რომ კომუნისტები და სოციალისტები სრულიად განსხვავებულ პლატფორმაზე დგანან ლიბერალ-კონსერვატორებთან შედარებით.

ქართული ოპოზიციის ღირებულებათა აჯაფსანდალი სწორედ დასავლურის შედეგი და გამოძახილია. საუბედუროდ, ჩვენ არ გვყვანან იმ მასშტაბის მოაზროვნე პოლიტიკოსები, რომ მათ შეძლონ კლასიკურ დასავლურ ლიბერალურ-კონსერვატიზმზე აქცენტის აღება, რადგან მათი საერთაშორისო კონტაქტები და დაფინანსებაც ბევრად ჩამორჩება დასავლეთელ სოციალისტ-კომუნისტთა მიერ გამოწვრთვნილ და დაფინანსებულ ენდემურ ორგანიზაციებს. შედეგიც სახეზეა.

ბუნებრივია, ასეთ ქაოსში ძალიან მარტივია პათოლოგიური სოციალისტურ-კომუნისტური იდეოლოგიის დასავლეთურად გასაღება, რაც ეროვნულ-კონსერვატიული სპექტრის მოქალაქეების გააფთრებას ადვილად ახერხებს და მერე შეუძლებელი ხდება კლასიკური დასავლური ლიბერალურ-კონსერვატიული იდეოლოგიის პლატფორმიდან საუბარი.

ანალოგიური პროცესი განვითარდა თავის დროზე ირანშიც, სადაც პრო-დასავლეთელმა სოციალისტ-კომუნისტებმა აიათოლების რეჟიმის დაფუძნებას ხელი შეუწყვეს კლასიკურ ლიბერალურ კონსერვატიზმთან კინკლაობის საფუძველზე და მერე თავად გახდნენ რეჟიმის მსხვერპლი.

სწორედ ამ პროცესის ერთერთ ქვესახეობას ვაკვირდებით მოქმედებაში ამ დღეებში, სადაც პრო-დასავლურმა აგრესიულმა კომუნისტებმა ღიად დააფიქსირეს თავიანთი პათოლოგიური ღირებულებები.