“ამ მოთხოვნით ივანიშვილს ექნება უკან დახევის სივრცე ისე, რომ კრიზისი დროებით მაინც გადაწყვიტოს და სანაცვლოდ, ქვეყნიდან გაქცევა არ მოუწიოს”– გრიგალაშვილი

თუ ივანიშვილი ძალაუფლებას ნებით არ თმობს, ანუ არ გვაბარებს სუსს და ცესკოს და არ ნიშნავს ახალ არჩევნებს, საჭიროა რევოლუცია – ამ წუთას ხალხში ამის მზაობა, ოპოზიციაში შესაბამისი რესურსი, ხოლო დასავლეთიდან ადეკვატური წნეხი(არაა მაგნიცკის სია) არ არსებობს და ესეც არის ფაქტი.

თუმცა, არსებული პროტესტი ივანიშვილისთვის ნებისმიერ შემთხვევაში დისკომფორტია და ჩვენ გვაქვს სავაჭრო ძალაუფლება, რომელიც შეგვიძლია უფრო რეალისტურ მოთხოვნებში გადავთარგმნოთ – ისეთში რომელთა შესრულებაც ივანიშვილისთვის ავტომატურად ძალაუფლებას დათმობის ტოლფასი არ იქნება და კომპრომისის შანსს გააჩენს.

ასეთი მოთხოვნებია:

– პოლიტპატიმრების გათავისუფლება (კვლევების თანახმად ამ მოთხოვნას საზოგადოების 80%-ზე მეტი უჭერს მხარს, ახალ არჩევნებს 60-ზე ოდნავ მეტი),

– რეპრესიული კანონების და ჯარიმების გაუქმება,

– სამართლიანი არჩევნები, მაგრამ არა საპარლამენტო. 7 თვეში ადგილობრივი ჩატარდეს ჩვენთვის მისაღები წესებით, სადაც ოპოზიცია, შეცდომებზე გადააზრებით, გამოიყენებს დიდი ქალაქების უპირატესობას.

თითოეული ეს მოთხოვნა ჩვენ მოგვცემს ამოსუნთქვის და რეჟიმის ძალაუფლებისთვის ძირის გამოთხრის შანსს.

პოლიტიკური პროცესი გაგრძელდება.

ასევე, ივანიშვილს ექნება უკან დახევის სივრცე ისე, რომ კრიზისი დროებით მაინც გადაწყვიტოს და სანაცვლოდ, ქვეყნიდან გაქცევა არ მოუწიოს.

მე მეშინია, რომ თუ მანევრირებას არ მოვახდენთ, გაზაფხული ავტომატურად არ მოიტანს რევოლუციას, ზაფხულში ხალხი დასასვენებლად წავა, ხალხს გამოფიტავს რეპრესიები და ეს საპროტესტო ტალღაც მიილევა. მეშინია რომ 2 თვეში 0 სავაჭრო ბერკეტი დაგვრჩება ბიძინასთან და პოლიტპატიმრების გამოშვება მხოლოდ მის კეთილ ნებაზე გახდება დამოკიდებული.

თუკი იმას ვიზამთ რაც დავწერე, ამაზე იმუშავებს მთელი ოპოზიცია და ტელემედია, ვფიქრობ დიდი შანსია გაზაფხულიდან რეალურად გაიაზრდოს საპროტესტო ტალღა, მრავალათასიანი აქციები დავაბრუნოთ და დავდოთ შედეგი.

თუ ვინმეს რევოლუციის გეგმა გაქვთ მითხარით, მოგეხმარებით, თქვენთან ერთად ჩავდგები წინა რიგებში, არასდროს დამიხევია უკან.