“ამ ლოგიკით, არცერთი პატიმარი არ უნდა იჯდეს ციხეში” – დეკანოზი შალვა კეკელია

ეპისკოპოსთა ერთი ნაწილის მიერ სააკაშვილის მხარდამჭერ პეტიციაზე ხელის მოწერას, მამა შალვა კეკელია ტელეკომპანია „ჯორჯიანთაიმსის“ ეთერში, გადაცემაში „დროული კითხვები“ გამოეხმაურა.
ვაკის მაცხოვრის ფერისცვალების სახელობის ტაძრის დეკანოზმა განაცხადა, რომ ამ ეპისკოპოსების მოტივაცია მისთვის  გაუგებარია.
„მე იმ ეპისკოპოსების პოზიცია არ მესმის. ვერაფრით ვერ ვიგებ. მაინტერესებს, როგორია მათი აზრი, არცერთი ადამიანი დანაშაულისათვის არ უნდა დაისაჯოს?
რა თქმა უნდა ეკლესია ყველას აძლევს შენდობას, მაგრამ საინტერესოა მათი აზრი – დამნაშავე უნდა იჯდეს თუ არა ციხეში?

ამ ლოგიკით, არცერთი პატიმარი არ უნდა იჯდეს ციხეში, ანუ ეს ეპისკოპოსები, ყველა პატიმრის გათავისუფლებას უნდა ითხოვდნენ მაგ ლოგიკით და მაგ მსჯელობით.
მაშინ ყველა პატიმარი გამოვუშვათ და საპატიმროები არ არსებობდეს საერთოდ,“- განაცხადა მამა შალვა კეკელიამ.

შეგახსენებთ, სოციალურ ქსელში გავრცელდა პეტიცია მიხეილ სააკაშვილის პატიმრობიდან გათავისუფლების შესახებ, რომელსაც ხელს ხელოვნების წარმომადგენლები, პოლიტიკოსები და უბრალო მოქალაქეები აწერენ.
პეტიციას ხელი, რამდენიმე სასულიერო პირმა, მათ შორის ეპისკოპოსებმაც მოაწერეს.