“აგენტის” სტატუსის მიკერება არის გაუგონარი უმადურობა” – შოთა შალელაშვილი

გულდასმით გავეცანი ,,ქართული ოცნების”პოლიტიკური დანაყოფის ,,ხალხის ძალა,,-ს მიერ ინიცირებულ კანონის პროექტებს ,,უცხოური გავლენის გამჭირვალობის შესახებ’’ და ,,უცხოელი აგენტების რეგისტრაციის შესახებ’’. გავეცანი ავტორისეული განმარტებებსაც, თუმცა მე ვერ ვხედავ გულწრფელ მიზანს გამოვლენილ იქნან მტრულად განწყობილი ქვეყნის წარმომადგენლები, მე ვხედავ უპრეცედენტო უმადურებას იმ საერთაშორისო ორგანიზაციების მიმართ, რომლებიც მრავალი წლის მანძილზე მხარს უჭერენ ქართველ ხალხს დემოკრატიზაციის, რეფორმების და სამართლიანი არჩევნების გზაზე. ,,უცხოური გავლენის აგენტი’’-ს სტატუსის მიკერება იმ ორგანიზაციებსა და თანამოქალაქეებზე, რომლებიც მუხლჩაუხრელად და ხშირად ინსტიტუციებზე ეფექტურად მუშაობენ ადამიანის უფლებებისა და თავისუფლებების მიმართულებით, იძულებით გადაადგილებულ პირთა, თავისუფალი მედიის და სასამართლოს მიმართ არის გაუგონარი უმადურობა.

შორს ვარ შეთქმულების თეორიებისგან, მაგრამ ვერაფრით ვერ ვხსნი ე.წ. ხალხის ძალის ინიციატივას და კიდევ უფრო მეტად მაღელვებს საქართველოს ხელისუფლების პოზიცია, განსაკუთრებით კი მაშინ, როცა სტუდენტ-ახალგაზრდები, აკადემიური სფეროს, მასმედიის, არასამთავრობო სექტორის წარმომადგენლები ფიზიკურად აპროტესტებენ ამ ინიციატივას. მე ვერაფრით ვერ ვხსნი და მაღელვებს ხელისუფლების უპასუხისმგებლო პოზიცია, როცა ევროინტეგრაციის გზაზე მდგარ ქვეყანას ხელოვნურ ბარიერებს უქმნიან, მათ შორის ქვეყნის საერთაშორისო მეგობრების მოწოდებების იგნორით და ხშირად ცინიკური კომენტარებით.

მეგობრებო, ეს კანონპროექტი არ გახლავთ ქართველი ხალხის არჩევანი, ეს არის სრულად ანტიკონსტიტუციური სულისკვეთებით ნაკარნახები ინიციატივა, დაუშვებელია ქვეყნის უზენაესი საკანონმდებლო აქტის შინაარსისგან გადახვევა!

უკეთ გაეცანით სამოქალაქო ორგანიზაციების საქმიანობის როლს და მნიშვნელობას დემოკრატიული ტრანსფორმაციის პირობებში, უკეთ გაეცანით საკუთარი ხალხის ნამდვილ ნება-სურვილს და გაემიჯნეთ ყველაფერს ანტიქართულს და ანტიდასავლურს !

ჩემი თვითმიზანი არის ძლიერი და ერთიანი საქართველო და სწორედ ამ მიზნით მე, მხარს დავუჭერ ყველა მშვიდობიან დეკლარაციას, რაც გააძლიერებს ჩვენ ევროატლანტიკურ ალიანსში გაწევრიანებას საქართველოს იმ მოქალაქეებთან ერთად, ვინც გულწრფელი სულისკვეთებით დღეს იცავს ქვეყანას !”