ადვოკატი ადასტურებს, რომ გულბაათ რცხილაძე ირანში წასვლას გეგმავდა

თბილისის საქალაქო სასამართლოში ორმაგი ჯაშუშობის ბრალდებით დაკავებული გულბაათ რცხილაძის სასამართლო პროცესი იწყება. წინასწარ ცნობილია, რომ ლელა მარიდაშვილი პრორუსული ორგანიზაცია ევრაზიის ინსტიტუტის დირექტორის პროცესს დახურავს, რადგან საქმეს გრიფი ადევს.

დაკავებულის ადვოკატი, ლაშა გოლუბიანი განმარტავს, რომ რცხილაძეს სასამართლოზე სიტყვის უფლების გამოყენება სურს, რადგან ბევრი აქვს სათქმელი.

უფლებადამცველთან საუბრისას დაკავებულმა განმარტა, რომ მისი დაკავება პრორუსული საბჭოს შექმნას უკავშირდება.

ამ ეტაპზე ისუვ უცნობია, რომელი ორი ქვეყნის ჯაშუშობას ედავებიან გულბაათ რცხილაძეს. არ არის გამორიცხული, რომ ერთ-ერთი ქვეყაა რუსეთი იყოს, მეორე კი ირანი. აღსანიშნავია, რომ ხმაურიანი დაკავების შემდეგ ირანის საელჩომ განცხადება გაავრცელა, სადაც დაწერა, რომ ეს უკანასკნელი ირანში იყო მიწვეული.

ადვოკატი აცხადებს, რომ გულბაათ რცხილაძე ირანში ტელეკომპანია “ობიექტივიდან” უნდა წასულიყო და ჟურნალისტური საქმიანობა უნდა განეხორციელებინა.

საქმეში გარკვეული ვიდეო-მასალები დევს, უბრალოდ, დეტალურად ვერ გეტყვით რა მასალები დევს და რა შინაარსის მასალებია იქ. თვითონ, დაკავებას პოლიტიკურად აქტიურობას უკავშირებს, უკავშირებს იმ ფაქტს რომ “რუსოფობიის მონიტორინგის საბჭო შექმნა…

ირანში წასვლასს აპირებდა, თუმცა ბოლო პერიოდში გადაიფიქრა, ოჯახური მდგომარეობის გამო. შესაძლოა, ერთ-ერთი [მიზეზი] იყოს ირანი, შეიძლება არ იყოს. ირანში ჩვეულებრივად სიუჟეტი უნდა გაეკეთებიდათ, მედიაკავშირმა “ობიექტივმა” ჯგუფი გამოყო, ერთ-ერთი ბატონი გულბაათი იყო, ასევე ერთი ოპერატპრი და ერთი ჟურნალისტი კიდევ. მათ ირანში მიმდინარე პროცესები უნდა გაეშუქებინათ”- ამბობს ლაშა გოლუბიანი.

სახელმწიფო უსაფრთხოების სამსახურმა გულბაათ რცხილაძე ჯაშუშობის ბრალდებით 30 მაისს დააკავა.

სუს-ში აცხადებენ, რომ ბრალდებული ერთდროულად თანამშრომლობდა ორი უცხო სახელმწიფოს სპეციალურ სამსახურებთან და ახორციელებდა პარალელურ სადაზვერვო საქმიანობას.

სახელმწიფო უსაფრთხოების სამსახური არ პასუხობს კითხვას, რომელია ის ორი ქვეყანა, რომელსაც, გამოძიების ვერსიით, ბრალდებული სადაზვერვო ინფორმაციას აწვდიდა.

გამოძიება დაწყებულია საქართველოს სისხის სამართლის კოდექსის 314-ე მუხლის 1 ნაწილით, რაც სასჯელის სახით 8-დან 12 წლამდე პატიმრობას ითვალისწინებს.
პრორუსული ორგანიზაცია ევრაზიის ინსტიტუტი ხშირად აწყობდა კონფერენციებს საქართველო-რუსეთის ურთიერთობებზე.

“აი, ფაქტის” ცნობით, გულბაათ რცხილაძის ორგანიზაციას, 2020 წლიდან აფინანსებს 2023 წელს, აშშ-ს მიერ დასანქცირებული რუსული “პრავფონდი”, რომელიც საქართველოში 2013 წლიდან მუშაობს.

საჯარო სივრცეში გავრცელებული ცნობების მიხედვით, გულბაათ რცხილაძეს საქართველოში რეგისტრირებული აქვს სულ ოთხი ორგანიზაცია: “ევრაზიის ინსტიტუტი”, “კავკასიური თანამშრომლობა”, “სახალხო მოძრაობა ქართულ-რუსული დიალოგისა და თანამშრომლობისთის” და “საქართველოს უკვდავი ჯარი”.

30 მაისს ჯაშუშობის ბრალდებით დააკავეს კიდევ ერთი ადამიანი – ის „სამოქალაქო მოსმენების კავკასიური ცენტრის“- დამფუძნებელი და ხელმძღვანელი ირაკლი ჩიხლაძეა.