საქართველოს პრეზიდენტმა ცენტრალურ აფრიკაში ვიზიტი გააუქმა. ინფორმაციას პრეზიდენტის ადმიანისტრაცია ავრცელებს.
„საქართველოს პრეზიდენტის ადმინისტრაცია ეხმაურება ბატონი მამუკა ჟღენტის მიერ დღეს სოციალური ქსელით გავრცელებულ უპასუხისმგებლო და სახელმწიფოს ინტერესების დამაზიანებელ განცხადებას.
საქართველოს პრეზიდენტის და მისი დელეგაციის ცენტრალური აფრიკის რესპუბლიკაში ვიზიტის შესახებ ინფორმაცია კონფიდენციალურია და მისი წინასწარ გავრცელება მკაცრად იკრძალება.
განსაკუთრებით აღმაშფოთებელი და დამაფიქრებელია ის, რომ მსგავს ინფორმაციას ცინიკურ კონტექსტში ავრცელებს საქართველოს ყოფილი ელჩი ევროსაბჭოში, რომელმაც შესანიშნავად იცის კონფიდენციალური ინფორმაციის მნიშვნელობა და მასთან მოპყრობის წესები.
ამგვარი განცხადების გამო, საქართველოს პრეზიდენტი და თავდაცვის სამინისტრო, სამშვიდობო მისიების უსაფრთხოების წესების თანახმად, იძულებული გახდნენ მარტში დაგეგმილი ვიზიტი გააუქმონ.
საქართველოს თავდაცვის ძალების უმაღლესი მთავარსარდალი წუხს იმის გამო, რომ ცენტრალური აფრიკის რესპუბლიკაში მარტის თვეში დაგეგმილი ვიზიტი და ქართველ ჯარისკაცებთან შეხვედრა ვერ განხორციელდება“, – ნათქვამია პრეზიდენტის ადმინისტრაციის მიერ გავრცელებულ განცხადებაში.
ევროსაბჭოში საქართველოს ყოფილმა ელჩმა, მამუკა ჟღენტმა, რამდენიმე საათით ადრე ფეისბუკზე დაწერა, რომ მისი ინფორმაციით, ზურაბიშვილი ცენტრალურ აფრიკაში 10-დღიან ვიზიტს გეგმავდა „დიდ დელეგაციასთან ერთად“.
კომენტარები