მედიცინის დოქტორი, გიორგი კავკასიძე:
“ნაცნობი მეკითხება – იცი რატომ მოიმატა კოვიდ-19 ვაქცინაციის მსურველების რაოდენობამ? ზაფხული მოდის, ხალხს დასვენება და გართობა უნდა, ხელისუფლება კი „აცრილებს“ პრივილეგიებს დაპირდა. მაგალითად ბარებში ღამის კლუბებში უპრობლემოდ შეეძლებათ დროს გატარებაო.
მე არ ვიცი, არც მინიხავს და არც მომისმენია მთავრობის ასეთი დაპირება. მიმაჩნია რომ არასწორი იქნება მოსახლეობის სეგრეგაცია „აცრილებად“ და „არაცრილებად“.
ჩემი აზრით იმუნიზაციის (აცრის) მოტივატორი დასვენება და გართობა კი არა იმის გათვითცნობიერება უნდა იყოს რომ
1. იმუნიზირებული ადამიანი გაცილებით „რთულად“ ინფიცირდება და თუ დაინფიცირდა, გაცილებით იოლ ფორმებში გადაიტანს კოვიდ-19-ს;
2. იმუნიზაცია არის პანდემიის/ეპიდემიის შეჩერების ყველაზე სწრაფი და „უმტკივნეულო“ გზა. „უმტკივნეულოში“ კოვიდ-19 ინფიცირების შედეგად გარდაცვლილების რაოდენობას ვგულისხმობ;
3. რამდენიც არ უნდა ვიბაქიბუქოთ, ობიექტური და სუბიექტური მიზეზების გამო ჩვენი ჯანმრთელობის სისტემა ნაკლებად ეფექტურია ვიდრე დასავლეთის. ერთ მილიონ მოსახლეზე კოვიდ-19 გარდაცვლილთა რაოდენობით გაცილებით უარესი სიტუაცია გვაქვს ვიდრე გერმანიას, ჰოლანდიას, რუსეთს, საბერძნეთს, უკრაინას და ა.შ. ამ პარამეტრით მსოლფიოში ჩვენზე უარესი მდგომარეობა 40 ქვეყანას აქვს, ჩვენზე უკეთესი – 160 ქვეყანას.
4. რაც ნაკლები ინფიცირებული გვეყოლება, მით ნაკლები იქნება პოსტ-კოვიდ გართულებები. მაგალითად თრომბოზები და თრომბოემბოლიები, სპერმატოგენეზის დარღვევა და შესაძლო უშვილობა ახალგაზრდა მამაკაცებში და სხვა;
ეს საკითხები ფართო დისკუსიის და კოვიდ-19-თან ბრძოლის სახელმწიფო პროგრამის ერთ-ერთი პრიორიტეტული მიმართულება უნდა იყოს.
მეორე საკითხია ჯანმოს (WHO) მიერ ავტორიზირებულ და რეკომენდირებულ ვაქცინებზე ხელმისაწვდომობა. ამ საკითხშიც სახელმწიფოს როლი არის პრიორიტეტული. სახელმწიფომ უნდა უზრუნველყოს ავტორიზებულ ვაქცინებზე ხელმისაწვდომობა, ან/და მისცეს კერძო სექტორს ავტორიზებული ვაქცინების შემოტანის საშუალება და „მოცვის“ გაზრდა. რაც ნიშნევს პრიორიტეტული ჯგუფების უფასო ვაქცინაციის პარალელურ „კომერციულ“ ვაქცინაციას.”
კომენტარები