ჟურნალისტი, ნინო სტურუა, სოციალურ ქსელში, აქვეყნებს ფოტოს და წერს:
ეს “საბრალო” არსება ხილიანზე მხვდება.
მესამე დღეა ასე გაძეგლებული დგას და ერთ წერტილს უყურებს…
ვის არ ვკითხე, სად არ მოვიკითხე, მაგრამ პასუხი არ იყო.
დღეს ერთმა ბიჭმა მითხრა, მეც გული მიკვდება მესამე დღეა ამის საცოდაობით, ეტყობა გამოაგდესო, თან ცალი თვალით ბრმა არისო…
შევხედე და მართლა ბრმა იყო!
კინაღამ გული გამისკდა, ახლა ორმაგად!
დავავლე ამ ჩემ კოსტას ხელი, შევვარდი მარკეტში და ვუყიდე ძეხვი.
გამოვქანდი, ვცდილობ ვაჭამო, თან ვეფერები…
არ ჭამს ცოცხალი თავით!
ნუ გადავწყვიტე, რომ კვდება და მაგიტომ…
აი ამ უბედურებაში ვარ და მოდის ერთი უსაყვარლესი ქალბატონი, სულ დედის გინებით
დაეცა თავს ამ “საცოდავს” და ლანძღავს.
ჩემ სახეზე ზუსტად მიხვდა რაც მჭირდა, სიტყვის გაღება არ მაცალა და მეუბნება:
-ეს არის სრულიად გათახსირებული ძაღლი!
შეყვარებულია აქ მცხოვრებ ლაბრადორზე! (და სახლზე მიმითითა, რასაც თვალს არ აშორებდა!)
იპარება ყოველ დილას და ზის ასე ძეგლივით!
ასე წააქინჩილეს ჩემი შეყვარებული ძეგლი!
მეც სულ თავში ვურტყი ის ძეხვი და კი ვაჭამე მერე სხვებს, ნუ კასტრირებულებს…
მოკლედ, გაზაფხულია მეგობრებო, გაზაფხულიიი…”
კომენტარები