“აბა, ბიძინა ივანიშვილი ფულს ჩემოდნებით კი არ არიგებდა…” – ბონდო მძინარაშვილი

ჟურნალისტი, საზოგადოებრივი მაუწყებლის ბორდის წევრი, ბონდო მძინარაშვილი, სოციალურ ქსელში, წერს: 

“პრემიერ-მინისტრმა ირაკლი ღარიბაშვილმა თქვა, ფონდ “ქართუში” მუშაობის დროს მინისტრებთან და სააკაშვილის დედასთან და მეუღლესთან კომუნიკაცია მქონდაო. მინისტრების გვარებიც დაასახელა.

და რომ არ ეთქვა, მსგავსი ურთიერთობა ვის გაუკვირდება ღარიბაშვილის მაშინდელი სტატუსის პირობებში? აბა, ბიძინა ივანიშვილი ფულს ჩემოდნებით კი არ არიგებდა, – სწორედ ამ ფონდის მეშვეობით აფინანსებდა პროექტებს და მშენებლობებს, რომლებსაც სააკაშვილი ზარ-ზეიმით ხსნიდა!

ჰოდა, ამ მოკლე ჭკუისებმაც დაასკვნეს: ფონდ “ქართუს” პრეზიდენტ ირაკლი ღარიბაშვილს “ფანტასტიური ურთიერთობა” ჰქონია სააკაშვილის მინისტრებთან და ოჯახის წევრებთან და რატომ მოუსმენდნენო!

პარლამენტის თავმჯდომარე დავით ბაქრაძეს როგორი ურთიერთობა ჰქონდა სააკაშვილის მინისტრებთან და ოჯახის წევრებთან, როცა სახლშიც კი უთვალთვალებდნენ?!

გესმით თქვენ: პარლამენტის თავმჯდომარეს უსმენდნენ და უთვალთვალებდნენ, – სახელმწიფოს მეორე პირს! თვითონ ბაქრაძემ აღიარა!

და ღარიბაშვილს არ მოუსმენდნენ?! მით უმეტეს, რომ მანიაკი სააკაშვილი, რომელიც ყველაზე და ყველაფერზე ეჭვიანობდა, იმით არ დაინტერესდებოდა, მისი მინისტრები “ქართუს” პრეზიდენტს რაზე ელაპარაკებოდნენ?!

აი, ამ უკანონო მოსმენების პირდაპირი კი არა, თუნდაც ირიბად და მინიშნებით “გაპრავებაც” კი ისეთი ნაძირლობაა, იმის იქით რომ აღარაფერი არსებობს!

არ გრცხვენიათ?!”