დემეტრე თავდადებულის ქუჩაზე მდებარე ქართულ-ავსტრიულ სკოლა “ფესვებში” კარანტინი გამოცხადდა. საგანმანათლებლო დაწესებულების მიერ გავრცელებულ განცხადებაში იმ მიზეზებზეა საუბარი, რამაც სასწავლო პროცესის შეჩერება გამოიწვია.
„ბოლო დღეებში საგრძნობლად მოიმატა მოსწავლეთა ავადობის მაჩვენებელმა, დღევანდელი მონაცემებით, მოსწავლეთა 42% არ გამოცხადდა სკოლაში სხვადასხვა ტიპის ვირუსული ინფექციის გამო! სკოლამ მიიღო რეკომენდაციები როგორც ვაკე-საბურთალოს რაიონის საგანმანათლებლო რესურსცენტრისგან, ისე დაავადებათა კონტროლის ეროვნული ცენტრისგან.
შექმნილი ვითარებიდან გამომდინარე, სკოლამ მიიღო გადაწყვეტილება 2020 წლის 13 თებერვლიდან 2020 წლის 18 თებერვლის ჩათვლით შეაჩეროს სასწავლო პროცესი! გაცდენილი აკადემიური საათები ანაზღაურდება“ – ნათქვამია განცხადებაში.
„პრაიმტაიმი“ სკოლის დირექტორს დაუკავშირდა. როგორც მანანა გვრიტიშვილი აცხადებს, ორ მოსწავლეს A და B ტიპის ვირუსი დაუდგინდა, გამოვლინდა ჩუტყვავილას შემთხვევებიც.
„ამჟამად სასწავლო პროცესი შეჩერებულია რამდენიმე დღით. ეს გადაწყვეტილება მას შემდეგ მივიღეთ, რაც მოსწავლეთა ავადობამ 55% -ს მიაღწია. ყოველდღიურად 10-12 ბავშვის გაბრუნება გვიწევდა სკოლიდან, რადგან ზოგს სიცხე ჰქონდა, ზოგს პირღებინება და ა.შ.
სკოლაში გვყავს ექიმი, თუმცა შეუძლებელია ყველა მოსწავლის გასინჯვა თუნდაც ერთ დღეში. სხვადასხვა ვირუსის მატარებელი მოსწავლე, რომელიც კლასში შედის, ის პოტენციურად აინფიცირებს სხვას. როგორც მშობლებისგან გვაქვს ინფორმაცია, ორ მოსწავლეს დაუდგინდა A ტიპის ვირუსი. იყო ასევე და B ტიპის ვირუსის შემთხვევა და ჩუტყვავილა. ამის შემდეგ დავუკავშირდით რესურსცენტრს, ასევე დაავადებათა კონტროლის ეროვნულ ცენტს. მათ გვითხრეს, რომ ჩვენი გადასაწყვეტი იყო, შევაჩერებდით სასწავლო პროცესს თუ არა. ამის შემდეგ მივიღეთ გადაწყვეტილება. გაცდენილი გაკვეთილები მშობლებთან შეთანხმებით ანაზღაურდება მათთვის სასურველ დროს.“
კომენტარები