„ალიასთან“ განათლების ყოფილი მინისტრი, დიმიტრი შაშკინი საუბრობს.
– ძალიან ცუდი ფაქტი მოხდა ჩხოროწყუში, სადაც სკოლის მოსწავლეები წაიყვანეს მერიის ტუალეტის სახეხად, მაგრამ კიდევ უფრო ცუდი გაგრძელება მოჰყვა – განათლების სამინისტროს სიჩუმის ფონზე, სკოლის დირექტორი იბარებს მშობლებს და სკოლიდან გამოსული მშობლები „ჩვენებას“ ცვლიან, და ეს მაშინ, როცა მერიის თანამშრომელმა უკვე ღიად აღიარა. და ამაზე ცუდი თითქოს რა უნდა იყოს და კიდევ ამაზე ცუდი მოხდა – მერიის თანამშრომელი იქეთ დებს ბავშვს ბრალს და პირდაპირ ეთერში აცხადებს არასრუწლოვანის გვარს, ვისაც ვიდეოს გადაღებას „აბრალებს“ – განათლების სამინისტრო კი ისევ დუმს – კანონი შეიცვალა და აღარ არის დანაშაული არასრულწლოვნების პირადი მონაცემის გამჟღავნება, ან მშობლის დაუკითხავად შვილის წაყვანა სადღაც, თუნდაც კარგ საქმეზე?
– თქვენ შეეხეთ ძალიან რთულ პრობლემას, პრობლემას, რომელიც იყო ჩემი ყველაზე დიდი გამოწვევა – სამწუხაროდ, ხშირად მშობელი შვილს თვლის, როგორც ამ კონკრეტული სკოლის მძევალს! მე ჩვეულებრივ ადამიანებზე არც ვბრაზდები და არც ვაფასებ მათ ქმედებას, ესენი სამწუხაროდ, ხედავენ ამ პირობებში, რომ მათი შვილები არიან მძევლები ამ კონკრეტული სკოლის. ყველას გმირობას ვერ მოსთხოვ. თქვენ ზუსტად თქვით, განათლების სამინისტროს და სამართალდამცველების სიჩუმის ფონზე, მშობელი ფიქრობს, მე ვიტყვი სიმართლეს, მაგრამ მერე ჩემ შვილს დასჯიან, ცუდ ნიშნებს დაუწერენ, არ გაახარებენ – ეს მართლაც სამწუხარო რეალობაა. განათლების სისტემა ყველაზე დიდი სისტემაა. მე ძალიან ხშირად მაკრიტიკებენ მანდატურების გამო, მიუხედავად იმისა, რომ მერე დატოვეს ეს მანდატურები და ახლაც არიან. პრინციპული საკითხი იყო, სკოლის დირექტორი, ან მასწავლებელი, რომელიც ბავშვს სცემს – არ უნდა იყოს სკოლაში. როდესაც მანდატურის სამსახური ჩამოყალიბდა – ჩემთვის ამ რეფორმის წარმატების ნიშანი იყო ის, რომ კერძო სკოლებიდან 20 000 ბავშვი გადავიდა საჯარო სკოლაში (მაშინ კერძო სკოლაში სწავლობდა 60 000 ბავშვი), 20 000 ბავშვის მშობლებმა თქვეს, რომ უკვე სახელმწიფო სკოლებში იყო უსაფრთხო გარემო. გამოაცხადოს სტატისტიკა განათლების სამინისტრომ, ბავშვებს შორის ძალადობის თითო ფაქტზე მოდიოდა 3-4 ფაქტი ძალადობისა დიდისგან ბავშვებზე! თმებზე მოქაჩვა, ცემა, ბავშვების დამცირება. ახლა ისევ მოეშვა და თავიდან დაიწყო ეს პრობლემა. ჩემი მინისტრობის პერიოდში, ვინმე ჩინოვნიკი გაბედავდა წაიყვანდა ბავშვებს ტუალეტების გასარეცხად? ყველა იქნებოდა პასუხისგებაში მიცემული და თუ ეს იქნებოდა ჩემი ბრალი, თუ ჩემი მინისტრობის პერიოდში მოსულა, რომ უცხო ადამიანი შევიდოდა სკოლაში და წაეყვანა ასე მონურ სამუშაოდ ბავშვები, დავტოვებდი სამსახურს. მკაფიო ჯაჭვია ადამიანების, რომლებიც არიან ამ სიტუაციაზე პასუხისმეგებელნი – ეს არის სკოლის დირექტორი, მასწავლებელი, რესურსცენტრის ხელმღვანელი და თანამშრომლები, უშუალოდ თავად მერი – ყველა ეს ადამიანი უნდა დაისაჯოს. წარმოგიდგენიათ, რომელიმე ნორმალურ ქვეყანაში მოვიდეს ვიღაც ადამიანი, მოკიდოს ბავშვებს ხელი და სადღაც წაიყვანოს? თუნდაც კინოს საყურებლად ან სასეირნოდ – გავანებოთ იმას თავი, რომ ჩინოვნიკების ტუალეტები ახეხინეს. ვიღაც ექსპერტები გამოხტნენ, რა გინდათ, ბავშვებს შრომას აჩვენენო – რა კავშირი აქვს ამას შრომასთან? თავისი შვილები გაუშვან ჩინოვნიკების ტუალეტების დასარეცხად.
– იმ შრომას აქვს თავისი უსფართხოების წესი, წყალში ბოტების გარეშე, სპეც. ტანსაცმლის გარეშე, ხელთათმანების გარეშე? ვინმემ იკითხა, რომელიმე ბავშვს ხომ არ აქვს ალერგია რომელიმე სარეცხ საშუალებაზე?
– მსოფლიოში ბავშვს არსად გაარეცხინებენ ტუალეტს, ეს ნონსესია. ყველა პროფესიას პატივს ვცემ, მაგრამ არსებობს პროფესია, რომელიც ბავშვმა არ შეიძლება შეასრულოს ნებაყოფლობითაც კი…
– კი, ისევე როგორც არ წაიყვანენ დამნაშავის დასაჭერად, ხანძრის ჩასაქრობად…
– ლიანდაგების დასაგებად… დამლაგებელმა იცის, როგორ დაიცვას თავი მუშაობისას, როგორ გამოიყენოს ესა, თუ ხსნარი… ეს არის დიდი მაგალითი იმისა, რა ხდება ქვეყანაში – ნახეთ, ბავშვები წაიყვანეს ბატონების ტუალეტების გასარეცხად. ჩვენ ვცხოვრობთ ბატონების საქართველოში, სადაც შეიძლება მოვიდეს ბატონების გამოგზავნილი მსახური, მონებად წაიყვანოს ბავშვები, არეცხინოს ამ ბატონების ტუალეტები, მერე დააშინონ მშობლები და შეეშინდებათ, რადგან ფიქრობენ, რომ მძევლები არიან მათი შვილები, ატესტასს არ მისცემენ, ნიშანს არ დაუწერენ – არ სჭირდება ამას დიდი ფილოსოფია, რით და როგორ დაემუქრებოდენ…
თამო კეშელავა, ალია
კომენტარები