ჩვენი დღევანდელი სოციუმის რაღაცნაირი ანატომიაა, ერთ-ერთი მნიშვნელოვანი მიზეზია, რის გამოც ვდგავართ ერთ ადგილზე ან უკუსვლის რეჟიმში ვართ უკანასკნელი 30 წლის მანძილზე – ამის შესახებ საქართველოს პირველი პრეზიდენტის ზვიად გამსახურდიას შვილი და გერმანიაში, საქართველოს საელჩოში დესპანი კონსტანტინე გამსახურდია სოციალურ ქსელში წერს.
„ნამდვილად საყურადღებო პოსტია. ჩვენი დღევანდელი სოციუმის რაღაცნაირი ანატომიაა, ერთ-ერთი მნიშვნელოვანი მიზეზია, რის გამოც ვდგავართ ერთ ადგილზე ან უკუსვლის რეჟიმში ვართ უკანასკნელი 30 წლის მანძილზე. რატომ ხდება ასე? იმიტომ რომ ძალიან სუსტი და მცირერიცხოვანია რეალური სულიერი თუ მატერიალური ღირებულებების მწარმოებელი საშუალო ფენა. ის პოზიციონირებს იმ ორ კატეგორიას შორის, რომელიც პოსტშია ნახსენები. სხვათა შორის, უცხოეთში წასული ხალხის დიდი ნაწილიც ასევე საშუალო ფენაა, რომელიც წყალივით გვჭირდება, მაგრამ აქ რაიმეს გაკეთების შესაძლებლობას ვერ ხედავს, რის გამოც იძულებულია უცხოეთში შექმნას ყოფიერების სიკეთეები.
ნანა ფალიანი წერს: „მდიდარ ოჯახებში გაზრდილ ბავშვებს მზამზარეულად ეძლევათ ფუფუნება და წარ-მატება. ეს ძალიან პოპულარული სიტყვა წარ-მატება რას ნიშნავს? მეტობით მიიღო ის, რაც თვითონ არ მოუპოვებია. წარუმატეს.
კეთილდღეობა, რომელშიც ადამიანს თავად არ მიუღია მონაწილეობა მას აყალიბებს მომხმარებლად და უნივერსალურ მომხმარებლად. ეს იმას ნიშნავს რომ ის ახდენს ყველაფრის აბსორბირებას, რის შექმნაში მონაწილეობა არ მიუღია. შესაბამისად ის ხდება მომხვეჭი, მტაცებელი.
ჩემს პოსტში მე ორივე მხარე განვიხილე და ის ფაქტობრივი უბედურება რაც დღეს ჭირს ჩვენს სოციუმს.
მეორე მხარე ისაა, რომ უქონელის და ღატაკ-უუფლებოს ოჯახიშვილი ასევე ვერ და არ მონაწილეობს ყოფიერების სიკეთეების შექმნაში. მას არ აღებინებენ მონაწილეობას! შესაბამისად ის იზრდება დაუკმაყოფილებელი, მშიერი და მისი შიმშილი, რომელიც გამოწვეულია ზედა ფენის გაუმაძღრობით, მასში ბადებს დამტაცებელს, ქურდბაცაცას.
მორალი: არც ერთი მხარის ოჯახიშვილები არ ღებულობენ მონაწილეობას კეთილდღეობის შექმნაში!
ერთს მზამზარეულად თავაზობენ უკვე ნაძარცვს, და ზრდიან მტაცებლად, მეორეს კი არ აკარებენ რესურსს რომლითაც შექმნიდა და მოიპოვებდა კეთილდღეობას.
შესაბამისად ქვეყანა იმყოფება მუდმივი დატაცება-მიტაცების, ძარცვის და გაქურდვის პირობებში.
ჩვენ ვცხოვრობთ სოციუმში, რომელიც გადავარდნილია „გარესკნელში“, ანუ მორალის მიღმა. და გვესმის კბილთა ღრჭენა“, – წერს კონსტანტინე გამსახურდია.
კომენტარები