გუშინ, გვიან ღამით, სოციალურ ქსელში სულისშემძვრელი ფოტო გავრცელდა. ახალგაზრდა კაცი, გიორგი ყელბერაშვილი წერდა, რომ ფოტოზე ასახული 70 წლის მოხუცი ქალბატონი, ნახალოვკაში, ხუდადოვის ქუჩაზე იდგა, წასასვლელი არსად ჰქონდა და ზამთრის პირველ ღამის გათენება ხანდაზმულს ქუჩაში მოუწევდა.
ახალგაზრდა კაცი საზოგადოებას მოუწოდებდა, რომ სანამ თავშესაფრის საკითხს მოაგვარებდნენ, რამდენიმე დღით მოხუცი ვინმეს შეეფარებინა.
ამ პოსტს დიდი გამოხმაურება მოჰყვა, დაახლოებით 2 საათში გიორგიმ ახალი ფოტოები გამოაქვეყნა, რომელზეც ისევ ისე ბებო იყო გამოსახული, ამჯერად თბილ გარემოში გადაღებული.
მერიკო ბებო სრულიად უცნობმა ქალბატონმა შეიფარა.
„პრაიმტაიმს“ სწორედ ის ქალბატონს, ეკატერინე ნოდია ესაუბრა, რომელმაც სრულიად უანგაროდ მოხუცი სახლში მიიყვანა და მასზე საკუთარი ოჯახის წევრივით დაიწყო ზრუნვა.
„გუშინ საღამოს, სანამ სამსახურიდან სახლში დავბრუნდებოდი, ფეისბუკზე შემთხვევით გადავაწყდი ახალგაზრდა ბიჭის სტატუსს, რომელიც ხუდადოვზე ქუჩაში დარჩენილ ბებოზე წერდა. მართალია, ჩემი ოჯახი არ არის მდიდარი და არც იმის ფუფუნება მაქვს, რომ ბებოსთვის სახლში ცალკე ოთახი შემეთავაზებინა, მაგრამ მაინც გადავწყვიტე სახლში წამეყვანა და თბილი გარემო დამეხვედრებინა.
მაშინვე დავურეკე ჩემს მცირეწლოვან შვილებს, ვუთხარი, რომ შეიძლება სამსახურიდან სახლში მისვლა დროულად ვერ მომეხერხებინა, რადგან სახლში მოხუცებული უნდა მიმეყვანა. ისე გაუხარდათ ბავშვებს, მაშინვე დაუწყიათ სამზადისი.
ამის შემდეგ, დავურეკე პოსტის ავტორს და ვუთხარი, სანამ თავშესაფარს მოუძებნით მანამდე შემიძლია ჩემთან წავიყვანო – მეთქი. ძალიან გაუხარდათ. უკვე ღამის 8 საათი იყო. შემდეგ გოგონები შემეხმიანნენ, რომლებმაც მითხრეს, რომ ბებოს ხუდადოვის ქუჩიდან ჩემს სახლთან ტაქსით გამოუშვებდნენ.
ამის შემდეგ უკვე ტაქსის მძღოლი დამიკავშირდა, რომელმაც მითხრა, რომ ბებოს სახლის კარამდე მოვაცილებო. მერიკო ბებოს მძღოლი მთელი გზა ულოცია.
გოგონებს, რომლებმაც ბებოს ჩემთან გამომგზავრების ორგანიზება მოაგვარეს, თან პროდუქტებიც გამოუტანებიათ.
ამ ქალბატონმა ჩვენს სახლში იმხელა სითბო, სიყვარული და სიკეთე შემოიტანა, რომ სიტყვებით გადმოცემა მიჭირს. ძალიან ღვთისნიერი ადამიანი აღმოჩნდა ბებო, რომელიც ლოცულობს. გულში ჰქონდა ჩახუტებული „მონაზონი ანას“ წიგნი.
თვითონ ქალბატონიც ძალიან ბედნიერი და გახარებული იყო. სახლში გვყავს პუდელის ჯიშის ძაღლი, რომელიც ოჯახის წევრების გარდა სხვასთან არ კონტაქტობს. ვერ აღგიწერთ ჩვენი ოჯახის ოთხფეხა წევრი როგორ ეფერებოდა ბებოს. მისი მოსვლის შემდეგ ოჯახის წევრებს აღარ მოგვკარებია და მთელი ღამე მასთან ერთად ეძინა.
ბებოს ხელი აქვს დაზიანებული, როგორც თავად მითხრა წაიქცა. ემადლიერება ექიმებს, რომლებმაც სრულიად უსასყიდლოდ აღმოუჩინეს დახმარება.
ვთხოვე, მოეცა უფლება, მივხმარებოდი მოწესრიგებაში, მაგრამ იმდენად მორიდებულია, რომ აბაზანაზეც უარი თქვა. ძალიან დათრგუნული და შეშინებული იყო, ქუდიც კი არ მოუხდია, საწოლშიც ასე ეძინა.
როგორც მისი მონათხრობიდან ვიცი, ჰყავს 4 შვილი, 2 გოგონა და ვაჟები. ბიჭები ზესტაფონში ცხოვრობენო, მაგრამ მათ ისე უჭირთ, რომ ვერაფრით მეხმარებიანო. გოგონები საზღვარგარეთ არიან, მეხმიანებიან, მაგრამ ახლა ისინიც უმუშევრად არიან და ვეღარ მეხმარებიანო.
დღეს მთხოვა, რომ შვილებთან დავაკავშირო სოციალური ქსელის მეშვეობით.
როგორც ბებო ამბობს თბილისში, ღამეს დიდი სამების ეკლესიაში ათევდა. პანდემიიდან გამომდინარე შეზღუდვების გამო, ღამე მისვლა იქ აღარ შეძლო. ეკლესიას ვასუფთავებდი და ვეხმარებოდიო- ამბობს.
არ მაქვს არანაირი პრობლემა, ბებოს დავიტოვებ. იქამდე მეყოლება სანამ საჭირო იქნება. მას ღია ცის ქვეშ ყოფნა აღარ მოუწევს. ერთი თვე იქნება თუ უფრო მეტი, მას არაფერი მოაკლდება, თბილ სახლში იქნება.“- ამბობს ეკა.
კომენტარები