“მიმიფურთხებია ასეთი დეპუტატობისთვის” – რას პასუხობს გრიგოლ ვაშაძეს თაკო ჩარკვიანი?

„ნაციონალური მოძრაობის“ ლიდერის, გრიგოლ ვაშაძის განცხადებას „პრაიმტაიმნიუსთან“ თაკო ჩარკვიანი ეხმაურება.

„გუშინ საერთაშორისო პარტნიორებმა თქვეს, რომ დაილაპაკეთ  მაგიდასთანო და როგორც ჩანს, ეს აქედან გამომდინარეობს. ეს კონკრეტულად გრიგოლ ვაშაძის პოზიციაა.

ეს ბატონი გრიგოლისგან რაღაც ახალია. ვაშაძე რომელ სადაო უბნებზე საუბრობს, მთლიანად გადაყრილია, როგორ ხდება ეს? სამართლებრივად შესაძლებელია, რომ თითო-თითო უბანი გადათვალონ? ხალხი ცოდვაა, ნუ მოვატყუებთ.

ეს ის პოზიციაა, რაც დავით უსუფაშვილმა გუშინ გააჟღერა. რა პარლამენტი, რა კომისია, რისი გამოძიება მოახერხა ოდესმე ოპოზიციამ, რომ ეს მოახერხოს? მე პირს არასდროს ვიცვლი. ეს არ არის რადიკალური პოზიცია, ეს არის სამართლებრივი პოზიცია. ხალხი ნუ გვყავს თამაშგარე პოზიციაში. 

ვთქვით ასეთი რამ, მოდით უცხოეთს გავაგებინოთ, დავანახოთ, ნახონ რა დონის გაყალბება და გარჩევებია, რაიმე მოლაპარაკება სამართლებრივად დაიწყება? ყველაფრის საქმის კურსში უნდა იყოს ხალხი. რუსთაველზე რომ ხალხი გვიდგანს გვერდით, ყველანაირი მოლაპარაკების მომსწრე უნდა გახდნენ. მე ახალი შემოსული ვარ პოლიტიკაში, არ ვაპირებ, ერთმა მოქალაქემაც რომ თქვას, 30 წლის მოთაღლითე გამხდარა ეს თაკო ჩარკვიანიცო, გამორიცხულია, მიმიფურთხებია ასეთი დეპუტატობისთვის. პრინციპულები ვიყოთ, არ ავცდეთ სამართლებრივ ჭრილს. ეს განცხადებები 4 დღის წინ არ იცოდნენ? გაოცებული ვარ გრიგოლის პოზიციით, ცოტა ადრე რატომ არ მოვისმინეთ ეს? ვდგავართ სამართლებრივ ჭრილში, არასამართლებრივ გარიგებაში ვერაფრით შევალ ხელისუფლებასთან“

შეგახსენებთ, გრიგოლ ვაშაძემ გაავრცელა განცხადება, სადაც ოპოზიციურ პარტიებს მოუწოდებს, რომ  ქუჩიდან გადაინაცვლონ საკანონმდებლო ორგანოს ტრიბუნასთან.