“საქართველოს მედიასივრცეში ამ ფაქტების გამოქვეყნებას უნდა დაედოს ტაბუ”

მიუნხენის ქართული მართლმადიდებელი ეკლესიის წინამძღვარი, დეკანოზი თამაზ ლომიძე, სოციალურ ქსელში წერს:

„გერმანია რომ ევროპასა და მსოფლიოში ერთ-ერთი ლიდერი სახელმწიფოა, ამას ფაქტებიც ადასტურებს და ეჭვიც არავის ეპარება. მოსახლეობის ცხოვრების ხარისხის შეფასებით გერმანია მსოფლიოს ქვეყნების პირველ, საუკეთესო ათეულშია. დანაშაული გერმანიაშიც ხდება, მძიმეც და უმძიმესიც. მაგრამ გერმანიის ტელევიზიით თქვენ ვერასოდეს ნახავთ დანაშაულის ისეთ დეტალურ, დამთრგუნველ და შეუბრალებელ განხილვებს, რაც ჩვენს ქვეყანაში ხდება. ჩვენთან ასე იმიტომ ხდება (გვეტყვიან ჟურნალისტები,) რომ ნდობაა დაკარგული ძალოვანი უწყებების, პროკურატურის, ხელისუფლების და ა.შ. ამიტომაც, ჩვენ უნდა გამოვიძიოთ და ისინი ვაიძულოთო.

სამწუხაროდ, არის ამ პასუხში სიმართლე და შეიძლება ნაწილობრივ დავეთანხმოთ. მაგრამ, ისევ გერმანიის სხვა მაგალითს მოგიყვანთ: 20 წლის განმავლობაში (დამეთანხმებიან აქ მცხოვრებნი) მე არ მინახავს არც გერმანიის ტელევიზიით და არც სხვა მედია საშუალებებით ერთი სუიციდის ფაქტის საჯარო განხილვაც კი. არა იმიტომ, რომ გერმანიაში არ ხდება სუიციდი, არამედ იმიტომ, რომ საკუთარი მოსახლეობის ფსიქიკას და სულიერ ჯანმრთელობას უფრთხილდებიან, განსაკუთრებით მოზარდებს და ცხოვრებისეული სტრესის ქვეშ მყოფ სხვა ადამიანებს.

რატომ არ გვესმის ეს საქართველოში? რატომ ვართ ასეთი შეუბრალებლები საკუთარი თავის და ხალხის მიმართ? საქართველოს მედიასივრცეში სუიციდის ფაქტების გამოქვეყნებას და მათ საჯარო განხილვას უნდა დაედოს აბსოლუტური ტაბუ. ეს კატეგორიულად დაუშვებელია და უკიდურესად საშიშია მოსახლეობისთვის. ამ მძიმე შემთხვევების თავიდან ასაცილებლად, საჯარო განხილვების გარეშე, ყველა მოწინავე ქვეყნის პრაქტიკის და გამოცდილების გათვალისწინებით, აქტიურად, მაგრამ ჩუმად უნდა იმუშაოს სახელმწიფომ.“