შრომის ინსპექტირების დეპარტამენტის ხელმძღვანელმა ბექა ფერაძემ მთავრობის უწყებათშორისი საბჭოს სხდომის დასრულების შემდეგ განაცხადება გააკეთა:
„აჭარის რეგიონში 6 სარიტუალო დარბაზის დაჯარიმება დაგვჭირდა მას შემდეგ, რაც რეკომენდაციების გავრცელების და გაფრთხილების მიუხედავად, კვლავ განახორციელეს სარიტუალო ღონისძიება. ჯამში, ქვეყნის მასშტაბით დაჯარიმებულია 20 ბიზნეს-სუბიექტი, სარიტუალო დარბაზი იმისთვის, რომ მათ შეზღუდვების მიუხედავად, აკრძალული ღონისძიება განახორციელეს. ღონისძიებები მოდიფიცირებას განიცდის და ადამიანების ნაწილი ცდილობს, რეგულაციების გვერდის ავლით განახორციელოს სხვადასხვა ღონისძიება. მაგალითად, ჩვენ ვნახეთ, რომ ქორწილი ტარდებოდა სადედოფლო კაბის გარეშე. არის ასევე სხვადასხვა მოდიფიკაციები. ეს საკითხები უწყებათშორისმა საბჭომ შეისწავლა და შესაბამისი რეაგირებაც მოვახდინეთ“
შეგახსენებთ: covid-19-ის გავრცელების რისკების გამო, ქვეყანაში ქორწილები, ქელეხები და სხვა სოციალური ღონისძიებები აკრძალულია, გარდა საარჩევნო კამპანიისა, სადაც შეკრებისას ჯანდაცვის ყველა რეკომენდაცია უნდა იყოს გათვალისწინებული.
ამ ეტაპისთვის, ნებადართულია რესტორნებში ვახშმობა, რეგულაციის დაცვით, შესაძლებელია ერთ რესტორანში ასეულობით ადამიანმაც ივახშმოს, მთავარია, ქორწილი არ იყოს. მაგრამ, მთავრობას რას გამოაპარებ, უპატარძლო ქორწილსაც სცნობს!
ქვეყნის მთავარ კლინიკაში კი ჯერ ისევ წყალი ჩადის, იმ თანხით რაც გამოუყვეს ინფექციურ საავადმყოფოს, მხოლოდ დამიწების, ვენტილაციის და სხვა პრობლემები გვარდება. სახურავის შეკეთება ისევ ვერ ხერხდება.
კომენტარები