ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ქვეყანაში ეპიდემიის პერიოდში 45 შემთხვევა პირველად დადასტურდა, ამიტომ შესაძლებელია ვიფიქროთ, რომ დაავადებამ ინტენსიური გავრცელების ფორმა მიიღო.
მისი თქმით, მართალია ქვეყანა ჯერ ისევ რჩება მწვანე ზონაში, დაავადების ზომიერი და კონტროლირებადი მატება ეჭვის ქვეშ დგება. თუმცა ეზუგბაიას განცხადებით, აჭარის რეგიონში მდგომარეობა სერიოზულია და იგი უკვე წითელ ზონადაა გამოცხადებული. მისი თქმით, იქ, ალბათ, დამატებითი ღონისიებების გატარება იქნება საჭირო.
8 სექტემბერს საქართველოში 45 ახალი შემთხვევა დაფიქსირდა. მარინა ეზუგბაიას განცხადებით, 5 უკავშირდება ფართომასშტაბიან ქორწილს თბილისში. 23 შემთხვევა – აჭარის რეგიონს.
“3 უკავშირდება დონას კლასტერს, 19 არის დადასტურებულ შემთხვევებთან კონტაქტი, 4 სამედიცინო პერსონალი ავერსის კლინიკიდან, 4 შემოტანილი, მათგან 1 სატვირთო ავტომობილის მძღოლია, 12 არის მოგზაურობის ისტორიით აჭარაში, 3-ზე მიმდინარეობს ეპიდკვლევა წყაროებისა და კონტაქტების დადგენის მიზნით”, — აღნიშნა ეზუგბაიამ.
ჯამში, საქართველოში კორონავირუსის დადასტურებულ შემთხვევათა რაოდენობა 1 729-მდე გაიზარდა, ამათგან 1 321 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.
კომენტარები