დღეს „ლელომ“ წარადგინა პროექტი „მარშალის გეგმა“.
„ალიას“ „ლელოს“ პრეზენტაციაზე და „მარშალის გეგმაზე“ ესაუბრება პოლიტოლოგი, ხათუნა ლაგაზიძე:
-ვაღიარებ, მომეწონა. ზოგადად ჩვენ არ ვართ განებივრებული პოლიტიკოსებით, რომლებიც პასუხისმგებლიანი დამოკიდებულებით გამოირჩევიან ამომრჩევლისადმი.
უაღრესად კარგად მომზადებული იყო „ლელოს“ რეკონსტრუქციის პროგრამა, „მარშალის გეგმა“, იყო სიღრმისეულად გაწერილი ყველა დეტალი და არა პოპულისტური ლოზუნგებით დახუნძლული. მათი დამოკიდებულება პასუხისმგებლიანია ამომრჩევლის მიმართ და საკუთარი თავის მიმართაც.
ძალიან კარგია, რომ ასეთი სიღრმისეული ხედვების პრეზენტაცია ვიხილეთ და კიდევ ველოდები რამდენიმე პოლიტიკოსისგან ინოვაციებით გამორჩეულ, საინტერესო პრეზენტაციებს. ეს არის ამ საარჩევნო წლის მთავარი ღირსება – მაღალი კვალიფიკაციის პროგრამები.
ახლა მთავარია პრეზენტაციაზე წარდგენილი ყველა პროექტი, ყველა წინადადება გადაითარგმნოს რიგითი ამომრჩევლის ენაზე, დავიდეს რიგითი ამომრჩევლის ინტერესებამდე, ჩხოროწყუს თუ ასპინძის მაცხოვრებელს უნდა აუხსნან, მაგალითად, რას ნიშნავს საერთაშორისო საფონდო ბირჯა კონკრეტულად მათთვის.
ჩემთვის ღერძული საკითხია საერთაშორისო საფონდო ბირჟის თემა და მასთან მიბმული სატრანსპორტო-სატრანზიტო პროექტები.
რეგიონებისკენაც უნდა გავიხედოთ და ამითიც ნიშანდობლივი იყო ეს პრეზენტაცია. ყველა რეგიონს აქვს რესურსი და ამ რესურსის დანახვა იყო ძალიან მნიშვნელოვანი.
ფერმერებზეც ისაუბრეს და აქაც სწორი აქცენტი დავინახე – რა არის ფერმერებში ყველაზე დიდი პრობლემა? ფერმერული განვითარების მთავარი ხაზი განათლებაზე გადის, დიდი დეფიციტი და პრობლემაა არასწორი, არასრულყოფილი საგანმანათლებლო სტრუქტურა. ამიტომ, ძალიან სასიამოვნო იყო მოსმენა, რომ ყოველწლიურად ასი ფერმერის გადამზადებას გეგმავენ.
უმნიშვნელოვანესი იყო ახალგაზრდებისთვის პირველი სამუშაო ადგილის მოძიების პროექტი და ახალდაქორწინებულთათვის პირველი ბინის თანადაფინანსების საკითხი.
ისაუბრეს ფინანსებზეც, როგორ მოიძიებენ თანხას, რა რესურსი აქვს ამ პროექტის განსახორციელებლად ქვეყანას და ნამდვილად შემიძლია თქმა, „ლელოს“ „მარშლის გეგმის“ განხროციელება, სრულიად შესრულებადია.
სასიამოვნოდ გაკვირვებული დავრჩი პრეზენტაციით. მიხარია, რომ არსებობს კიდევ ერთი პოლიტიკური გუნდი, რომლის საფირმო ნიშნად არ იქცა პოპულიზმი, რომელსაც შეუძლია პრობლემების სიღრმისეული ანალიზი და შემდეგ ასეთი კარგად მომზადებული პროექტის შემოთავაზება.
ალია
კომენტარები